Fietsrenne is 'nne katholieke sjport. En dat bliek mer ins. Oet welke lan komme de bekintenisse van d'r aafgelaope tiëd? 't Zun alling Amerikane en Hollendere die bekinne, die zich sjuldig veule, die mienge zich te motte verantwoorde tengenuvver.. Ja tengenuvver wae? Zichzelf? 't Publiek? 't Zun alling protestante die zich continu sjuldig veule, die 'n permanente angs hubbe um get verkierd te doon.
Welke Fransoze, Belsje, Italiane of Sjpanjole hubbe bekind? Volges meech gaene. Die hubbe dat neet nudig. Katholieke zun neet bang vur d'r sjtraof va God, want ederaen kriet absolutie, zelfs nao d'r doëd nog. Sjterker nog, uvver de doeje nix dan gods. Eech deenk dat same mit meech gans Italië in opsjtand wuur gekomme es ze Marco Pantani zienge Tour-zege huie aafgepak. Vur waete allemaol dat e neet gans zuver waor, me os katholieke mak dat niks oet. Ederaen daet wal 'ns get faot, och hee. Hee hat zelfs d'r hoëgste priës motte betale d'r vur.
Marco Pantani, winnaar Giro & Tour 1998
Marco Pantani waor held, is held en blief held. En juus dat is get wat die protestante neet kinne hubbe: heldeveriëring. Mit Lance Armstrong begoes e nuuj hoofsjtuk nao d'r Tour de Dopage. Aene dae kanker uvverwonne hou, dae d'r doëd in de owwe gekeke hat én och nog 'ns Amerikaan,
dae mót wal zuver zie. Hee waor nao 7 Tour-zeges hillig, nae hee waor God, sjterker nog, hee sjtong zelfs bovve God! En toen bleek dat e valsj gesjpuld hou, toen begoes vur de protestante 'nne nuje beeldenstorm. Alle hillige, alle helde moeste en zouwe valle. Ze moeste zelf bekinne, mit hun kneje dur d'r sjtub, zoe deep mäöglik!
Me dae beeldesjturm is in de kiem gesjmoord. Noe de Hollendere zoe good fietse, zelfs 'nne tiëd 2e gesjtande hubbe, dat mót wal 't bewies zie dat d'r sjport noe zuver is. Os aege helde, os aege hillige, die wil vur toch neet lotte valle? Want aene van os, 'nne Hollender,
dae zou toch nooooit doping gebruke? Al gaar neet '
nao alles wat gebäörd is'..
Zag vur dat neet in 1999 och? Nao d'r Tour de Dopage, '
nao alles wat gebäörd is' en al gans aene dae op e häörke nao zelf doëd waor,
dae zou toch nooooit doping gebruke? "
D'r sjport is zuverder, dat zieste toch?" Toen woolt vur bedroge were en zun vur 't och gewore. Noe zaet ederaen 't zelfde, althans de Hollendere. Me al hun argumente zun gebaseerd op geveul, op vertroewe, op subjectieve waarneming. "
Ze fietse toch minder hel noe.. Ze kinne wer inzeenkinge.. De zies toch dat Froome zuver is?" Eech zeen 't neet. Eech huur zelfs dat Froome sjneller dan wae och d'r Mont Ventoux opgefiets is, vanoet 't zadel, mit e hoëg trapfrequentie. Oë kin vur dat och wer van?
Begriep meech good, eech wil Froome neet besjuldige. Me vriesjpreke wie de Hollendere noe dunt, nae dat kin eech och neet. Eech hub ging bewieze um te zigke of e zuver is of neet. Me mak 't meech get oet? Eech zeen actie, eech zeen helde, eech zeen luuj kapot goon of bovve zichzelf oetsjtijge. Daovur kiek eech fietsrenne. En jao, vur zalle pas uvver 2 of 3, mesjien zelfs pas uvver 10 jaor waete of 't ech zuver waor. Me dat mak d'r Tour noe neet minder leuk. En 't blief grappig um de Hollendere te zie, wie ze landgenote in besjerming neme en verdedige, wat ze juus ander lan verwiete; dat ze sjtiekem toch wer wille geleuve in dae dreum, in de katholieke heldeveriëring en absolutie en dat hunne nuje beeldesjturm in de kiem is gesjmoord: heerlik!
