Juliana / Julienne van Cornillon
1192: Juliana wurd gebore in Retinne, e plaetsjke bie Fléron, dus nevve Luuk
1197: Juliana gaet nao 't kloester van Mont Cornillon (Corneliusberg)
1207: Juliana liegk de eed van gelofte aaf es Augustines
1209: Juliana begint visioene te kriege:
Ze ziet 'nne volle mond, mè d'r ontbrik ae sjtukske. Van aartsdiake Jacques de Pantaléon huurt ze dat dit symbool sjtaet vur 't ontbreke van 'nne feesdaag vur 't allerhilligste van de 7 sacramente: d'r hostie, 't lichaam van Christus.
1222/30: Juliana wurd Priorin in 't kloester
1246: Sacramentsdag wurd in 't Bisdom Luuk ingesjtild dur bisjop Robert van Thourotte
1248: Juliana wurd vur d'r twiede kier verdreve oet 't kloester; de zusters vinne häör te sjtreng
1258: Juliana is gesjtorve i Fosses-la-Ville
1261: Jacques Pantaléon wurd gekoze tot paus: Urbanus IV
1264: Paus Urbanus IV sjtilt Sacramentsdag in es officiële feesdaag in de ganse keerk, mit de pauselike bull "Transiturus de Hoc Mundo"
1317: Paus Clemens V erkint Sacramentsdag opnuuj en vanaf toen wurd 't pas ech populair
1869: Juliana wurd zalig verklaord
Gaene minder dan Thomas van Aquino (gebore in 1225) verblief es dominikaner monnik tusje 1259 en 1265 (regelmaotig) an 't pauselik hof - toevallig och de jaore dat Urbanus IV paus is - en Thomas sjrief daonao 5 gezange vur Sacramentsdag, officieel 'Corpus Christi', mit allemaol es thema 't Sacrament, d'r hostie (hostia), 't broëd (panis):
- Lauda Sion
- Adoro te devote
- Verbum supernum prodiens (mit 't sjtukske "O Salutaris Hostia")
- Pange Lingua (mit 't sjtuk "Tantum ergo")
- Sacris Solemniis (mit 't sjtuk "Panis Angelicus")
(Panis Angelicus, dur Andrea Bocelli)
Pas 'nne hovve iëw ieder, in 1215, woorte de 7 Sacramente vasgesjtild bie 't 4e Lateraans Concilie. Die Sacramente zun mit name aenmaolige momente, wie de däöp, huwelik en priesterwiejing. Och wurd dao vasgelach dat aene van die 7 bovve de res oetsjtik: de Communie. Veer deenke dan drek an de 1e Communie, mè och deenke vur an 'communicere' en dat is wat gebäört: de kums in contac mit God zelf, letterlik! Bie dat Concilie is namelik dur paus Innocentius III och de 'transsubstantiatieliër' vasgelach. Trans-substantie, verandering van substantie, dit wil zigke dat 't broëd en d'r wiën in de mis bie de consecratie verandere in 't Lichaam en Blood van Christus, mit de wäörd die Jezus zelf oetgesjproke zou hubbe bie 't litste aovendmaol: 'es taeke van 't ummerdeurend verband'. Vur zeente nog ummer broëd en wiën en die hubbe nog ummer de kinmerke van gewoën broëd en wiën, mè in feite is hun betaekenis, hun essentie, hun 'substantie' veranderd. Vergeliek 't mit os aege lichaam, oë in 5 jaor tied eder cel en eder atoom vervange is, mè os essentie, os persuunlikhaed is nog ummer 'tzelfde.
.jpg)
(D'r geconsacreerde hostie - God zelf - traejt nao boete)
Dae hostie (van 'hostia' = sjlachoffer) is dus nao de consecratie 't Lichaam van Christus en volges de driejvuldighaedsliër is dat dus God; vur ete dan dus God. Mè volges dae bull oet 1264 wurd 't broëd wal genuttig, mè neet vertaerd, 't wurd gegette, mè 't verandert neet, umdat 't neet opgaet in d'r eter, mè d'r ontvanger wurd d'r geliëkvurmig aan.
En neet alling eet vur God, mè vur bringe 'm och nao boete, aene kiër per jaor. In dae tiëd waor 't nog neet normaal um edere daag of week ter communie te goe, hoegoet aene kiër per jaor. Dat God zelf boete de keerk (zië aege hoës) kump, is dus 'n zengening vur ederaen dae 'm ziet en vur alle plaatsje oë heë langskump. Daomit kump de processie tot in alle oetheuk van de parochie. Es God dan toch nao boete kump, dun vur dat mit alle iër en glorie die 'm toekump: 'pronke', Broonk dus. En alle beelde, groepe, uniforme, vlagge, muziek en blomme zun aegelik alling mer biezaak. De belangriekste biezaak - volges meech belangrieker dan 't religieuze - is de sociale cohesie, de samehang en verbroedering binne 'n gemeensjap.
1264 - 2014: 750 jaor later is d'r al 50 jaor ging processie mie gewes i Luuk. In Limburg, dat hiel lang bisdom Luuk waor, wurd dit wal nog (groëts) geveerd en de Limburgse sjutterieje bringe op 19 juni de Broonk 'truuk nao Luuk':
(Truuk nao Luuk, L1)
Bekiek hie aander jubilea.
Geen opmerkingen:
Een reactie posten