Paus Franciscus

Mit de keerk hub eech 'n haat-leefde-verhouding. Zoe geleuf eech totaal neet, mè hub ummer de verhaole, mit name de evangelies, hiel erg interessant gevoonde. Wie erg eech de dogma's roond geboorteplanning en euthanasie veend, zoe geweldig vin eech de dogma's roond driejvuldighaed en transsubstantiatie. En terwiel eech inzeen dat hun machspositie dik de oorzaak is van misbruuk, erkin eech nog mië 't belang van religie es beendmiddel in 'n samelaeving. En wie .. eech waor mit de conservatieve ideeë van de litste pause, zoe bliej bin eech mit de oetsjprake van d'r nuje paus: Franciscus I.

Op 28 februari 2013 traejt - nao bekans 8 jaor - paus Benedictus XVI aaf (in e riejke van aaftraejende Europese vorste: Nederland, Belsj, Sjpanje), es uursjte paus in ruum 700 jaor. Normaal wurd 'nne paus pas opgevolg es e sjtirft, 't is dus uniek dat d'r noe 2 pause laeve. Och waor 't abnormaal wie sjnel 'nne nuje paus gekoze waor (op 13 maart, 2e dag van 't conclaaf), heë is d'r uursjte oet de Nuuj-Weld, d'r uursjte jezuïet en och uniek is zienge naam. Nog nooit droog 'nne paus d'r naam van Franciscus van Assisi.

Hie get oetsjprake van paus Franciscus op e riejke:

13 maart 2013 - Habemus Papam (vur hubbe 'nne paus): "Buona sera"
Bergoglio laef al jaore in soberhaed en dit hult e och es paus vol. Heë begruut de luuj mit 'n seempel "gojjenaovend", dreug ging deur gewade mè seempel wit, hat 'nne zilvere i.p.v. gouwe vissjersreenk en keest d'r naam van 't sjoëlvurbeeld van soberhaed - "apostel van de erm luuj" - Franciscus van Assisi. Heë gaet och neet in 't paliës woene, mè in 't gasteverbliëf en op d'r aovend dat e gekoze waor, pak e same mit de kardinale gewoën de bus truuk nao 't hotel.

19 maart 2013 - Nao de inaugurele mis vuurt d'r paus neet in d'r gesjlote mè 'nne ope pausmobiel en heë sjtapt zelfs oet um 'nne gehandicapte te begroete:

24 mei 2013 - "Jezus is och gesjtorve vur oongeläövige"

juli 2013 - "Es 'nne homo van gojje wil is en God zeukt, wae bin eech um 'm te veroordele?"

11 sept 2013 - Paus wil 'n dialoog tusje christene en oongeläövige.

26 jan 2014 - Paus reup op tot vraej in Oekraïne en lut 2 doeve los.

27 april 2014 - Paus verklaort Johannes Paulus II en Johannes XXIII hillig.

25 mei 2014 - Op Westelikke Jordaanoever reup d'r paus op tot vraej tusje Israël en Palestina.

21 juni 2014 - Paus reup maffia op um berouw te toëne.

14 sept 2014 - Paus trowt 20 koppels, o.a. 'n vrow die al e keend hat en koppels die al samewoene

19 okt - 2014 - Paus verklaort Paulus VI zalig.

25 nov - 2014 - Europees Parlement

29 nov 2014 - Paus ontmoet in Turkije patriarch Bartholomeus en moefti Rahmi Yaran. Heë reup op tot dialoog tusje de godsdeenste en vrug moslimleiders op te sjtoon tenge extremiste.

22 dec 2014 - Paus beneumt 15 'kwale' oë de curie an liejt // Paus wurd dur EU (Martin Schulz) vurgedrage vur Nobel Vredespriës, n.a.v. de toenadering tusje Cuba en de VS.

24 dec 2014 - Paus belt op keersjaovend mit christelikke vluchtelinge in Irak.
25 dec 2014 - Paus neumt mit name alle keender en de oorlogssjlachtoffers in Irak en Syrië.