Vastenaovend

't Is alwer zoe wiëd
Zoe dur 't jaor vraog eech meech dikker aaf
De luuj die sjnäöre roond, 'n sjnoëts pies op d'r groond
't Is meech e gejaag en e gedraaf
Wie kump me van die carrousel ins aaf
Wat me daet vur te laeve mit get sjpas
Mit Karneval ins lekker alles oet die kas
Dan zit 't vur de res van 't jaor wer good
En volgend jaor zing veer mit gojje mood

't Is alwer zoe wiëd, 't woort och sjtilkes tiëd
De Vastenaovend kump d'r aa
't Is alwer zoe wiëd, 't woort och sjtilkes tiëd
Sjträöp euch de pekskes mer wer aa
En zit dat maske van aldaag ins van euch aaf
Laot euch ins kinne, roop ins af en toe 'alaaf!'
't Is alwer zoe wiëd, 't woort och sjtilkes tiëd
De Vastenaovend kump d'r aa
't Is alwer zoe wiëd, 't woort och sjtilkes tiëd
Noe brik de sjpas driej daag ruum aa

't Ganse jaor die planke vur d'r kop
Mè werke wie e peërd, is dat dan alles weërd?
't Zit toch gans get andersj in d'r dop
Dat kriet me gans vur nix en gans vur nop
Ederaen daet zich veur of eder God-wit-wat is
Mè wach mer tot 't wer ins Vastenaovend is
Dan hoef die kloneriej gaaroet neet mie
En wieste bis zal ederaen dan zie

An Karneval versjlaaf
Eech bin mit Karneval gebore
't Waor 't uursjte wat eech zoog op dizze weld
En d'rek waor eech verlore
Eech kin 't gaaroet neet mie misse, vur gae geld
Al van d'r alleruursjte daag al aaf
Bin eech an Karneval versjlaaf

De Karneval.. is get wie loch..
En zoonder loch kin eech neet laeve
De Karneval.. is get wie loch..
Es eech d'r zoonder mot, begint mie ganse liëf te baeve
Doeg.. 't meech neet aa..
En nem meech dat i Gods naam toch neet aaf
D'r allerfiengste tiëd va gans 't jaor
Dao bin eech aa versjlaaf

Is 't d'r ilfde van d'r ilfde
Begin eech d'rek te trille, gans va kop tot tiën
En dat is eder jaor 't zelfde
Dan is 't um, da kin eech neet serieus mie ziën
In plaatsj van 'gojjendaag' zigk eech 'alaaf!'
Eech bin an Karneval versjlaaf

Is Esjegonstig wer gekomme
Dan deenk eech: "Noondepie 't is alwer gedoo!"
Dan is 't sjloes mit al dae sjtomme
't Leve zal dan ziene gank gewoën wer goo
En in de Vaste, jao, dan kick eech aaf
Mè eech blief an Karneval versjlaaf

Sjlechste Limburger

D'r Limburgse sjriever Ton van Reen hat de aafgelaope weke 'n verkezing gehouwe. In plaatsj van "D'r Groëtste" wool heë dis kiër d'r "Sjlechste" Limburger keze. Hiëvur hou heë zelf al 'n vurselectie gemak van 3 Limburgers, oet 3 versjillende tiëdperke en van 3 versjillende disciplines:

• Max graaf de Marchant et d'Ansembourg
  * 18 januari 1894 - † 24 januari 1975
  Gouverneur va Limburg ('41-'44 NSB)
  In die hoedanighaed mede-verantwoordelik vur massadeportaties en moorde
  2e Kamer ('37-'40 NSB en fractievurzitter)
  1e Kamer ('35-'37 NSB)
  Prov. State ('27-'30 RKSP en '35-'37 NSB)
  Burgemaester va Amsterao ('25-'34)

• Petrus Regout
  * 23 maart 1801 - † 18 februari 1878
  Groët-industrieel / fabrieksdirecteur
  1e Kamer (1848-1859)
  Verantwoordelik o.a. vur:
  350 sjterftes an cholera, dur ondervoeding
  500 kraamsjterftes (mit name doëdgebore baby's)

• Nicolaes Dillenburg (of Tillenborg)
  Actief tusje 1734 en 1778
  Beul / "scherprechter" mit name van vermeende 'bokkeriejers'
  250 executies in Oosterieks 's Hertogenrade
  40 executies in Oosterieks Valkeberg
  paar hoonderd executies in ander gebiede, o.a. Aoke
  paar hoonderd heurmoorde, o.a. in Gelre
  en talloze martelinge, die neet zelde tot d'r doëd hubbe geleid

Berich L1: http://www.1limburg.nl/de-marchant-et-dansembourg-slechtste-limburger-ooit?context=default

Le Pen

Al zoe'n 400.000 jaor gelaeje taekende 'nne vurouwer van d'r miensj e figuur op 'n sjelp. Vur waete neet wat e daomit hat wille zigke, mè wal dat dit bewus gedoon is, dus mit 'n raeje en neet zoemer per oongeluk. En 15.000 jaor gelaeje hubbe luuj al taekeninge gemak in grotte in Sjpanje en Frankriëk. Ze taekende mit name de dere oë ze op jaagde en ze taekende zichzelf, luuj, jagers. En zoe'n 5,5 doëzend jaor gelaeje taekende luuj litters, wäörd; 't sjrif waor oetgevoonde.

Mit dat sjrif en mit de pen hubbe luuj hun gedechtes en vursjtillingsvermoge (dat wat oos oondersjeijd van dere) op kinne sjrieve en dur tiëd en aafsjtand kinne verplaatsje. Mit de pen woorte prachtige taekeninge gemak. Mit de pen woorte gezichte en name veriëwigd. Mit de pen woorte ingewikkelde ideë en wetensjap opgesjreve. Mit de pen woorte nuuj oetgevoonde mesjienger en hoëzer ontworpe. Mit de pen woorte grappe gesjreve en getaekend, wie de penne die zichzelf taekene van M.C. Escher (bove). Mit die pen gun vur eders kiër sjtimme - mesjien wal op Le Pen - en lot vur waete wat oos miening is en wae oos maog leide. En mit diezelfde pen woorte beuk gesjrieve, wie The Lord of the Rings, de Thora, Mein Kampf, d'r Biëbel, La Divina Comedia, de Koran en och de Kamasutra en de IKEA-gids.