Dansbaar of dance-bar

Dis kiër wer gans get andersj. E leedsje oë eech op kin danse. Tja, danse kin eech neet, althans neet wat luuj danse neume, volges peskes enzoe. Nae, danse is juus wie muziek, 't mot neet volges raegels en peskes, me 't mot oet dië hart komme. Noe wil 't geval dat hiel väöl leedsjes e geveul bie meech oprope, bie de miëste wil eech och mitzinge en kin eech dus och neet sjtil blieve zitte.

Ae leedsje dat neet zoe bekind zal zie, is Der Spielmannsfluch van In Extremo. Dis band kump oet Berlien en mak metal mit middeliewse instrumente: fläöte, liere, harpe, luite, doedelzek enz. enz. 'n Deel van de leedsjes is och aod, of althans de teks, en were soms gezonge in vraem tale: Latien, Noors of aod-Duutsj. Later mië uvver dis band. Spielmannsfluch is gewoën in 't Duutsj en sjtaet op 't album Verehrt und Angespien. Spielmannsfluch heesj oorsjpronkelik "Des Sängers Fluch" en is gesjreve dur d'r dichter Ludwig Uhland in 1814. 't Leedsje/gedich gaet uvver twie zengers, aene ouwe en 'nne jonge, die gun zinge vur 'n kunningspaar, warsjienlik urges in de middeliewe. D'r kunning is neet gauw tevraeje en erg sjnel koëd. D'r ouwe zenger hat d'r jonge nog gewaarsjuwd: "Spiel die besten Lieder, stimm an den vollsten Ton!" Wie d'r jonge zenger uvver de leefde zong, sjmoolt de kunningin van melancholie, oëdur d'r kunning reup: "Ihr habt mein Volk geblendet. Verlangt ihr nun mein Weib?" Hee wurd dus koëd en sjtik mit zië zjwaard d'r jonge zenger neer, in de erm van d'r ouwe, dae hiel hel sjriewt:

"Du verfluchter Mörder, du Fluch des Spielmann Tun!
Umsonst sei all dein Ringen, mit Blut befleckt dein Tun!
Des Königs Namen meldet kein Lied, kein Heldenbuch.
Versunken und vergessen; das ist des Spielmanns Fluch.
Es regnet. Es regnet Blut. Es regnet den Spielmannsfluch."

Dan wer e gans ander leedsje. Oet de "Missa Brevis in G" (KV 140) van W.A. Mozart, 't "Agnus Dei". Missa Brevis wil gewoen zigke: 'n korte mis, dus alling de vaste gezange: Kyrie-Gloria-Credo-Sanctus-Benedictus-Agnus Dei. De teks is neet zoe hiel sjpectaculair: "Agnus Dei, qui tolis pecata mundi, miserere nobis, dona nobis pacem" - "Lemmeke va God, dat de zun van de weld wegnimp, ontferm deech uvver os en gef os de vraej" Me este deech in dae tiëd gaes inlaeve, de twiede helf van d'r 18e iëw: d'r pruketiëd. Dan zieste opins wie revolutionair dae Mozart is, es me niks aandersj gewend is wie zoëne serieuze Bach enzoe. Aal moes opins opgevrolik were, verseerd en soms sjuut Mozart dao e bietsje in dur, me hië pakte 't hiel fië aa: 't begint vrie serieus en zelfs saai vur sommige luuj. In d'r solo van de sopraan kump al get mië emotie, me nog neet hartversjäörend. Zoe wie 't leed is opgeboewd, wurd twie kiër 't "Agnus Dei" beantwoord mit "miserere nobis", wat dus die sopraansolo's zun. D'r driejde kiër wurd geantwoord mit "dona nobis pacem" en dao veulse de revolutie die al in gans Europa in de loch hink, 't breke mit 't verlaeje, alles mot gans nuuj. Vergeliek zelf mer 'ns d'r solo vanaf 2:00 mit 't sjtuk d'rvur. Mozart sjrief dit in 't jaor 1773: twië jaor later zou de Amerikaanse revolutie oetbreke en 14 jaor daonao d'r Franse. Zelf kin eech oonder dit leed neet sjtil blieve sjtoon en eech zeen de dansende koppels al gans vur meech.

Nog e leedsje oë gaene op sjtil kin bliëve sjtoë: Devil's Dance Floor van Flogging Molly. E leuk Iers bandje, mit 'nne zenger zoe roëd es 't mer zië kint en "his seven fucking friends".

Dan zun d'r nog genog welskes mit karneval oë eech wal 'ns op probeer te danse, me die besjpaar eech euch. Wal nog aene va Limburgse baojem: Janse Bagge Bend, mit Dans Amelberga:

Tekste van leedsjes

Dag 8. Leedsjes. Tekste. De vraog is dus: van welk leesje kinse de teks, alle wäörd? Van welk leedsje kin eech de teks aeglik neet?

Lot vur dan 's beginne mit 't uursjte leedsje oë eech de teks - dus alle wäörd - van koes. Dat waor al op de lieger sjoël: 't Limburgs Volksleed, och bekind es "Bronsgroen Eikenhout". Jao, eech waet 't, de teks is in 't Hollensj. En 't gief inderdaad e beeld dat Hollendere gan zouwe wille zië. E beeld dat neet representatief is en erg melancholisch en nostalgisch is. Dur alle otobane, fabrieke en massatoerisme huurse gae "nachtegaaltje in het bronsgroen eikenhout" zinge of 't "lied des leeuweriks over het malse korenveld" en dae "hoorn des herders" ziet me alling nog in dat dagbook van dae hoond. 't Twiede koeplit is mesjien get reëler: "de brede stroom der Maas", "weeld'rig, sappig veldgewas" en "bloemengaard en beemd en bos". 't Driejde en veerde koeplit zun hie op neet te hure, me kin vur natuurlik wal oet d'r kop. Vurral 't "Oud Oranjehuis" zing vur allemaol gruutsj mit... ahum...

Nevve de wesjliës van leedsjes die eech oet d'r kop kin, hubbe sommige 'n opmerkelike teks. Zoe hubse 't leedsje "American Pie" van Don McLean en och bekind van Madonna. Dit leedsje is oet 1971 en besjrief de popmuziek tot dat moment. Alhoewel d'r zenger zelf nooit dudelik gewes is uvver de betaekenis, gun d'r hiel väöl geruchte de runde. Dudelik is dat "the day the music died" verwies nao 3 februari 1959, de nach dat e vleegmesjieng mit Buddy Holly, Ritchie Valens en The Big Bopper crasht.
In 't uursjte koeplit besjrief McLean wie hee gezitte is an't bringe op 't moment dat e 't nuujs huurt. "February made me shiver, with every paper I'd deliver". Bob Dylan wurd bedoeld mit "the Jester", "the King and Queen" zouwe John en Jacky Kennedy kinne zie. Later wurd nog 'ns "the King" geneumd, dat zou Elvis kinne zie, me och M.L. King. The Birds were letterlik geneumd, juus wie "a Rolling Stone". The Beatles were bedoeld mit "the Sergeants played a marching tune" en "the quartet practiced in the park".'t Viefde koeplit gaet dudelik uvver 1969. "We were all in one place" is Woodstock en "a generation lost in space" kin de drugs zie, me och dae zommer is Neil Armstrong 'in space' geland op d'r mond. Me och 't incident, 't drama in Altamont in december '69 wurd geneumd: "no angel born in hell" zun dudelik de Hells Angels die de beveiliging dege en oedur luuj zelfs zun gesjtorve. Es litste "a girl who sang the blues" zou Janis Joplin kinne zie. Loester en geneet:

Nog e leedsje mit 'n biezondere teks is van Baz Luhrman. Wae? Dae van 'Wear Sunscreen'. Huh? Good, dan loester 'ns hie. Ech 'n songteks is 't neet, 't is mië gesjproke. 't Bevat 'n groete opsomming van levestips. Handige, me och grappige, cliché, me och woër. E paar leuke:
- Don't worry about the future; or worry, but know that worrying is as effective as trying to solve an algebra equation by chewing bubblegum.
- Be kind to your knees; you'll miss them when they're gone.
- Dance, even if you have nowhere to do it but in your own living room.
- Don't read beauty magazines; they will only make you feel ugly.
- Accept certain inalienable truths: prices will rise, politicians will philander, you too will get old.

Dan nog aene, dae eech och al hiel lang gelaeje koes mitzinge. 'Blieve Loepe' van Rowwen Hèze. Sjprik vur zeech, zou eech zigke.

"Wo ge och loëpt en wat ge och dinkt,
niemand di zedde wat good is of slech,
niemand di wit wie verliest of wie wint,
ge komt op 't end beej owzelf terech"

Leedsjes en evenemente

Leedsjes die deech herinnere an evenemente. 't Uursjte dat i meech opkump is 't ZLF, 't mini-OLS, 't groët sjuttersfiës dat vur i 2007 hubbe maoge organisere i Mhaer. In 't weekend van 13, 14 en 15 juli keme doezende luuj nao Mhaer. Dit is och 't groetste evenement dat ooit i Mhaer georganiseerd is gewore. Op d'r vriedig waor vur de ouwer luuj "Kiene, Kaarte en Keuvele" en tegeliek sjete vur de sjponsors. 't 's Aoves keme artieste vur de jeug, same oonder d'r naam "Donna Soirree". Op zotterdig keem de oetzendig van 't "Balkon van Limburg" van L1 vanaf de sjutterswei en och uvverdag koeste de keender van de basissjoël hun creaties lotte zie, in twië keender-sjutterieje. Daonao waor 'n mis op 't kesjiël en aansjletend 'nne durpsaovend, opgeloesterd dur 'de kapel', de "Bergweider Musikanten". D'r zoondig waor natuurlik 't groëte fiës zelf: 't Zuid-Limburgs Federatiefeest, oë ruum 15 doezend luuj op aafkeme. Loester en geneet:

'n Ander nummer dat i meech opkump, wie kin 't och andersj, hat wer mit Network te make. D'r tiëd dat vur ze op alle plaatsje gezië hubbe: in Aesde op 2e Keersjdag, op de Hoevefeeste, in Mergraote, op de ReiMeifeeste, in Ikkelder, op de Kesjtiëlfeeste, in Norrebik, de Hei-Opfeeste, d'r Hubertusmert i Gullepe, jubileum van de voetbalclub in Ees, in de Lifepalace i Gullepe, op de Vielenerhoffeeste i Viele, in d'r Kursaal i Voëre, sjuttersfiës i Wielder, Nuujjaorsbal i Mhaer, Sjlennich, Keer, Ubachsberg, oë neet?!?
En de koes de setlis oondertusje och al dreume. 't Begoes sjtandaard mit "Let me entertain you" en de twiede set begoes mit "It's my life". Nao 'nne haop gelul ("Zun die va Iëpe och hië?!?" en "Hey Mecheluhh!") en nao de Duutsje Medley (Schöne Maid, Festival der Liebe, Skandal um Rosi), de Hollensje Medley (Beetje verliefd, Manuela, Alle duiven op de Dam) en de Wheatus-medley en nao vurral hiel lang pauzes woort 't pas interessant. Pas in de driejde set - die begoes mit Kryptonite - keme de echte leuke nummers an bod: Limp Bizkit-medley, Metallica-medley, Red Hot Chili Peppers-medley, me vurral, nao Liquido, Open Your Eyes, Drunken Lullabies, Basket Case, Jump Around en All The Small Things, waor 't traditioneel tiëd vur.. en dao kump e.. Pennywise!!!

't Volgende is neet ech 'n 'evenement', me wal 'n gebäörtenis die meech ummer zal bieblieve. In 2003 sjtong d'r kloon Bush op 't peunt um Irak binne te valle. Hee hou d'r oorlog verklaord an 't 'terrorisme', wat dat och maog zie.. In september 2001 hat e zelf 'nne aansjlaag op o.a. 't WTC beraamd en daodur koes hee lekker oorlogje goon sjpeule. Es uursjte in Afghanistan, oë hee nooit Bin Laden zou veende; dat moes zienge opvolger vur 'm doë. Dan nog Irak, tja Bush sr. hou dao nog get te good, dus moes Bush jr. 't mer oplosse. Aangezie de Bush-familie fleenk in d'r olie zit, plus dat wapes verkoch motte blieve were in de ganse weld; want e land dat vur e groët deel driejt op 't producere va wapes, hat wal 'nne aafzitmert nudig en weldvraej zou dao neet gunstig vur zië. Dus d'r moes en d'r zou 'nne oorlog komme. Verrik jao, dan hubse och nog 'n aanleijing nudig... euhm... Hub vur ooit wapes an ozze ex-vrund Sadam verkoch? Ok, dan gebruuk vur dát argument: Sadam hat massavernietigingswapes! Es hee die al zou hubbe, moeste die van Amerika komme, me good. Umdat ze nooit gevoonde woorte en ze d'r gewoen neet waore, gong later ederaen op de kneej en deep dur d'r sjtub; behalve ozze Bak van Ellende natuurlik, dae geleuf nog i sprookjes. In februari en maart bin eech 2 kiër goon demonstrere in Amsterdam. Op 15 februari 2003 waore d'r uvver de ganse weld ruum 10 miljoen luuj op de baen, ténge oorlog, vúr vraej. Me de machhubbers woolte oorlog en ze zouwe 't kriege och. Eech krieg nog eders kier traone in m'n owwe en veul meech ongeleuflik koëd en oonmechtig es eech hie aan deenk.

"everytime you drop the bomb, you kill the god your child has born"

"4000 hungry children leave us per hour from starvation, while bilions are spent on bombs, creating death showers"

En wae nog neet genog hat van evenemente:

Pinkpop 2001, Offspring en water:

Pinkpop 2002, System of a Down:

Pinkpop 2003, Flogging Molly:

Rock am Ring 2004, Red Hot Chili Peppers:

Rock am Ring 2005, Within Temptation:

Pukkelpop 2005, Nightwish:

Rock am Ring 2006, KoRn:

Graspop 2006, Saxon:

Pukkelpop 2006, Snow Patrol, accoustisch:

Pinkpop 2007, Muse:

Graspop 2007, Iron Maiden:

Pinkpop Classic 2007, Status Quo:

Rock am Ring 2008, Sportfreunde Stiller, EK-voetbal:

Pinkpop 2009, Bruce -The Boss- Springsteen:

Werchter 2010, P!nk vluug uvver 't publiek:

Pinkpop 2011, Selah Sue:

Sziget 2011, Skunk Anansie lup uvver 't publiek:

Pinkpop 2012, Seasick Steve:

Leedsjes en plaatsje

Gister leedsjes die an luuj herinnere, huuj leedsjes die an plaatsje herinnere.

't Sjoenste leedsje uvver Mhaer, is gebaseerd op dis melodie:

De teks is natuurlik aangepas:

"In de Nuujsjtraot op ing bank, hub eech 's Livvenhiër bedank,
dat eech i Mhaer hub maoge woene, gans mië leëve lank.
In d'r Hoesberg in d'r boch, hub eech 's Livvenhiër gevrog,
of eech i Mhaer dan och oëts sjterve maog.
Me bovvenaa aan de Sjtashaag, hub eech Zjezeke gezag,
vraog d'r pap of heë dao efkes nog mit wach.
In de Nuujsjtraot op ing bank, hub eech 's Livvenhiër bedank,
dat eech i Mhaer gewoend hub, gans mië leëve lank."

Leedsjes en luuj

En zoe zitse op dag 5. Dis kiër is de opdrach: "e leedsje dat deech an aene lut deenke".
Um 't get sjpannend te hotte, zal eech neet zigke an wae eech mot deenke, bie eder leedsje. Dat maogse zelf oetzeuke of verzin d'r zelf aene bie.

Sjtandaard 't uursjte nummer van de twiede set van Network, in al die jaore dat vur trow zun goon kieke: "It's now or never, I ain't gonna live forever".

"Haore bloond, boezem roond; longe fleenk, lekker deenk"

"I'm longing for your touch and I welcome your sweet six six six in my heart"

"eech wil deech vur altied verwerme; vur altied, mit e bietsje geluk"

"You shook me all night long"

"You know I am on tonight and my hips don't lie and I am starting to feel it's right.
The attraction, the tension, baby, like this is perfection"

"And every time I scratch my nails down someone else's back I hope you feel it!"

Blek Rivver

Alwer de 4e opdrach van de "30 daag leedsjes". Nao mie favoriete en mins favoriete leedsje, e leedsje oe eech bliej va weer, noe aent oe eech dreuvig va weer. Och dao komme versjillende i meech op, eder mit 'n ander raej oevur eech d'r dreuvig va zou were. Dizze sjprik vur zeech:

"I know someday you'll have a beautiful life. I know you'll be a star, in somebody else's sky. But why, why can't it be, can't it be mine?"

Nog zoe aene dae vur zeech sjprik en dae ging wäörd nudig hat:

"Is a dream a lie, if it don't come true or is it something worse?"

Och dizze hat mesjien ging introductie nudig. Hub CCR (Creedence Clearwater Revival) pas laat ontdek. Ofja, de nummers koes eech wal, me nooit gerealiseerd dat die al-le-maol van hun zun. Bevurbeeld 'Proud Mary', dat ederaen kint es 'Rolling down a river' van Tina Turner, is gewoen van CCR. 'Bad Moond Rising' en 'Have you ever seen the rain', koes eech natuurlik wal. Pas nao 't zië van The Big Lebowski, oë 'Lookin' out my back door' en 'the Creedence-tapes' 'n belangrieke rol sjpeule, bin eech meech goon verdepe in CCR. Dan kumse automatisch dit nummer tenge:

"Saying: 'someday you'll understand'. But 'someday' never comes"

"There ain't no way to hide your lyin' eyes"

En d'r litste:

Vanallesget

And now for something completely different.. E leedsje oe eech bliej va weer. Dat zun d'r wer versjillende, me hië e paar, kees zelf mer:

The Raveonettes - Bang
Eech waet neet vurwat, me 't hat gewoen get..

Vampire Weekend - A-Punk
Jajao, vampiereweekend, 't waor gewoen ae groët fiës op Werchter 2010 in de volle zon. Dit bringt 't zunneke toch wer e bietsje korterbie.

Rowwen Hèze & Los Lobos - Kroenenberg / Ay Te Dejo En San Antonio
Los Lobos en Los Limbos. America meets Tex-Mex. De combinatie van muzikante is perfec. Muziek mit geveul, humor en leefde.

Ska-P - Legalización
Gister bekind gemak dat ze dit jaor wer op Sziget sjtun. E fiës is gegarandeerd!

Hoodwinked - Be Prepared
Just watch and enjoy!

Effe zeuke

Oë dag is, is nach en oë wit is, is zjwart. Dus es eech e favoriet leedsje hub, zou eech och e mins favoriet leedsje motte hubbe. Eech merk dat dit e sjtuk lestiger is, es leuke leedsjes opneume. Logisch, want de mins favoriete huurse neet edere dag. Gelukkig mer.

Vurwat eech dit 'leed' haat? Oë zal eech 'ns beginne? Es uursjte umdat eech 'nne hekel hub an nationalisme, bie welk land of wat dan och. Lan zun bizarre oetveendinge, vurral oet d'r 19e iëw. Mesjien kump 't umdat eech an de grens woen of umdat eech dur die façade heenprik. E land is niks, gaar niks. Vur zun luuj, me vur zun ging burgers van áé land. D'r is niks Hollensj an meech of an edere andere Hollender en d'r is niks Belsj, Frans of wat dan och an luuj. Natuurlik hat 't culture, me die zun neet landgeboonde, die laope inaen uvver en hubbe ging grenze. Eech kal 'n taal, die officieel bie 't Hollensj huurt, me mit 'n Duutsje grammatica en 'n Franse oetsjpraak. Eech veul meech verboonde mit dis regio, me meech mak dat neet oet of dat noe Limburg, Luuk, Nord-Rein Westfalen, Wallonië, Vlaanderen, Heuvelland, Nederland of wie dan och heesj. E land is puur 'n besjtuurlike indeling, gebaseerd op mach; wae maog oë get te zigke hubbe? Dat is peunt 1. Es twiede hub eech niks mit Willem van Oranje, oë 't ganse leed uvver gaet. Eech hub niks mit hem, neet mit de Republiek der Zeven Provinciën, noch mit d'r Gouwe Iëw. Willem hat zelf troewes gaar gae Hollensj gekald, hee kalde Frans. Es driejde hub eech niks mit 't Nederland van noe. De monarchie die ging monarchie is, de republiek die ging republiek maog heesje. Want juus zoe good wie Frankriek 'n monarchie is gebleve, oondanks revoluties, zoe is Nederland ummer 'n republiek gebleve. Kiek mer ins nao wie luuj mit mach of gezag umgunt. In Frankriek wurd mit lof gekald uvver d'r president en zun luuj gruutsj op hun land, de 'driejkleur' en hun geschiedenis. In Nederland moste d'r kop neet bovve 't miejveld oetsjteke, neet opvalle en vurral neet mienge daste mië bis wie 'nne andere. Hie is ederaen geliek, neet mië, neet minder. De kunningin (of kunning) mot vurral gewoën doë, juus wie de volkshelde, die allemaol "zoe lekker gewoën zun gebleve". Ze mot och neet mië verdene en precies doë wat veer zigke. Zelfs in religie erkint me gaene andere es zichzelf, al mot vur dao 'n aparte keerk vur oprichte. Daodur hat eder sjtad, zelfs eder wiek hun aege protestants-hervormde-gereformeerde keerk. Nae, dae "koning van Hispanje" waor better aaf zoonder die lestige Hollendere.

In aanvulling op de weerzin tenge Hollendere kump natuurlik de walgelike versie van 't prachtige Sjotse Amazing Grace: "Waarheen, waarvoor".. Me och de verkrachting "Viva Hollandia" maoge ze va meech zoe gauw mäöglik verbranne, same mit al die Worstjes op m'n borstjes en Paarden in de gang, um uvver dae sjtotterende lispelende kampjoep nog mer te zjwiëge.. Dae durf eech neet ins hie te plaatsje.. Heb je even blèèèèh...

Wat troewes och zoe gauw mäögelik vergette maog were: Motown en d'r ganse funk, soul en mit name disco. Negers mit afro-kapsels in väöl te kleurige pekskes mit 'nne väöl te brijje sjmaaajl op 't gezich en versjrikkelik ingesjtudeerde peskes. Heaven must be missin' angel, papa was a rolling stone, disco inferno, earth wind and fire en wat al niet meer zij..

Me wat is noe 't allerergste, 't miëst versjrikkelike en afsjuwelike leed? 't Zou uvver Keersjmes goe, me hat dao niks mit te make, 't Is 'n verlengde van Motown en 't lut meech alling verlange dat de Keersjmes zoe gauw mäöglik um is. 't Is 'n sjan vur alle sjoen klanke die gemak zun vur die daag, nem noe 't Transeamus, 't Jesu bleibet meine Freude van J.S. Bach of 't Adeste Fideles. Loester mer zelf, me de bis gewaarsjuwd.

Noe hub eech wal wer genog versjrikkelike muziek gehuurd. Murge e leedsje oe eech bliej va weer!

Hoppaaa

Hoppaaa, dao bin eech dan.

Troewes, este dit neet versjtaes, liër deech plat of gank get andersj doë!

De uursjte oetdaging, gekrege va 't Chris, de '30 daag leedsjes'..
Dus 't uursjte leedsje zou motte goon uvver "mie favoriete leedsje".
Tja wat is dat, vur eder gelegenhaed of geveul is wal 'n ander leedsje toepasselik.
Leedsjes die zoe i meech opkomme zun 't "Dies Irae" oet 't Requiem van W.A. Mozart, 't "Credo" oet de Missa Angelis in 't Gregoriaans, me och "Run to the Hills" van Iron Maiden (oë de miëste festivalbezeukers sjmurges neet zoe bliej mit zunt, wie zou dat toch kinne?) en "Bat outta Hell" van Meatloaf. Allemaol nummers mit 'n combinatie van gojje teks en muziek, melodie en tempi.

't Dies Irae is 'n onderdael van 't Requiem, de doejemis. Dit leedsje wurd al lang neet mie gezonge op begreffenisse, vanwaege de teks en betaekenis. 't Gaet uvver d'r dag des oordeels, 't hienaomaals, de helse vure die deech te wachte zouwe sjtoe en de sjmeekbede um daovan besjpaard te blieve. 't Is - zoe wie alle Gregoriaanse en religieuze muzieksjtukke - geneumd nao de uursjte wäörd "Dies irae, dies illa", "Dag van toorn (dag der wrake), o die dag". Eech waet neet zekker wieväöl dur dit sjtuk dur Mozart zelf is gesjreve, aagezië hee neet de ganse mis hat kinne sjrieve, umdat hee in dae tied zelf gesjtorve is. Me 't sjtuk is bekans rock 'n roll, nae metal zelfs. Loester 't mer ins. De sjlotwäörd were dik es afzonderlik leed gezonge, daodur erg bekind: "Pie Jesu domine, dona eis requiem", "leve hiër Jezus, gef hun rus".

't Credo is de 'geloofsbelijdenis', och bekind es 'de twaalf artikelen van het geloof' en is 'n onderdeel van de Katholieke mis. 't Credo is vasgesjtild bie 't Concilie van Nicea in 325 en de aensjtimmige melodie kump oet 1071. Paus Gregorius I 'd'r groëte' wurd gezië es d'r groondligker van de keerkelike muziek, hee sjtorf in 604 en d'r term 'gregoriaans' verwies nao hem. 't Credo is neet gans de twelf artikele, me oetgebreider, poëtischer vin eech zelf. Alling al de passage: "Deum de Deo, Lumen de Lumine, Deum verum de Deo vero", "God oet God, leech oet leech, woere God oet woere God", eech zou zigke: verzin 't mer 'ns. Uvverigens hat ae woord en mië specifiek 3 litters oet ae woord, geleid tot 't schisma, de sjplitsing tusje de Katholieke en de Orthodoxe keerk. Uvver d'r Hillige Gees (Spiritum Sanctum) wurd gezag: "qui ex Patre" dat dae vurkump oet God, me later is dao "Filioque" an toegevoeg, dus dat d'r gees oet God én d'r zoon vurkump. De toevoeging 'que' sjtaet namelik vur 'n opsomming, juus wie SPQR: "Senatus PopulusQue Romanus".

Wae is neet op 'n festivalcamping wakker gewore dur lestige bure? Does a bear shit in the woods? Ederaen kint dat geveul, daste 'nne gezellige festivaldag (en nach) achter d'r rugk hubs, kapot meuj in e väöl te klae tentsje op 'n haof-laeggelaope lochbid in 'nne óf te werme óf te kouwe sjlaopzak liegks en nao väöl te väöl beer/alcohol en väöl te winnig ore sjlaop, begint ing of e paar tente wiër aene volle gaas te sjriëwe: "WHITE MAN CAME, ACROSS THE SEA". Mot eech nog mië zigke? Of zinge, better gezag.. Want jao, eech mot bekinne, ééch bin dae hovvendul.. Me zoelang urges andersj de wäörd "HE BROUGHT US PAIN AND MISERY" kleenke, zal eech 't blieve doe!

Bat out of Hell, lot vur dao neet te väöl wäörd an zuver make, want jao, 't is e sjmaerig nummer, of better gezag 'e nummerke'. Dit is rock 'n roll wie 't huurt te zië, vol passie, goj solo's, 'nne heerlike intro én outro, 'nne zenger mit 'n heftige sjtim en 't gaet uvver, ja loester dat mer lekker zelf, 10 minute laank!

En dan noe ech mie favoriete leedsje. 't Is e nummer van 'nne ouwe Canadese rocker, dae al mië wie 100, nae ruim 1000 nummers, plate, concerte en bandcombinaties achter zienge naam hat sjtoe: d'r Neil van d'r Young. Hee mak al jaore lank muziek, in vanalle sjtijle, me op 't album 'Freedom' gaet e truuk nao z'n roots. 't Nummer "Rockin' in the free world" kump oet in 1989, es d'r moër in Berlien en 't Iezere Gerdieng in Europa valle. De leus "keep on rockin' in the free world" kin me vrie interpretere en zal vur ederaen 'n ander lading hubbe, me oeteindelik vertegenwoordigt 't och get gemeensjappeliks, de vriejhaed oe 't album heen geneumd is. De koeplitte verheerlike neet, zoe wieste zouws verwachte, de westerse weld, me bekritiseert juus de neo-liberale samelaeving, 't eder-vur-zich en 't kapitalisme. 't Gaet uvver 'luuj die sjlaope in hun sjoon', 'n vrow in de nach, mit 'nne baby op d'r erm dae nooit nao sjoël zal goë, nooit verleef zal were en nooit 'cool' zal zië... 't Refrein zou dus zoewal letterlik es ironisch opgevat kinne were. Zoe wie Klein Orkest och zingt, de luuj leenks en rechs, oos en wes van d'r moër, dreume allemaol van vriejhaed, of d'r oonderdrukker noe communisme of kapitalisme heesj. Vur meechzelf sjtaet 't symbool vur alle vurme van oonderdrukking, och sociaal en biologisch, eder vurm van belemmering in dieng vriejhaed. Daonevve is 't och nog ins e nummer lekker um te drumme en vrie in te improvisere. Geneet d'r va! En blief rocke!