Top Klassiek 2

Op dis website were de - volges hun - 100 bitste klassieke muzieksjtukke geneumd.

Hou eech uursj 'n liës mit operasjtukke, hie e lieske mit mieng top 10 favoriete symfoniesjtukke:

1. "Ode an die Freude" oet de 9e Symfonie van Ludwig von Beethoven. Och bekind es Europees Volksleed en mesjien juus zoe bekind es zieng 5e symfonie: TA TA TA TA.

(Beethoven - Ode an die Freude)

2. "O Fortuna" oet de Carmina Burana van Carl Orff. Hee makde zienge aege muziek op dis middeliëwse sjrifte en gedichte, die in dit sjtuk de Godin van 't Lot (Fortuna) bezinge.

(Orff - Carmina Burana)

3. "Boléro" van Maurice Ravel, dat begint mit 'n sjerpe trom die 't ganse sjtuk d'r zelfde raegel herhaalt en oe eder instrument dezelfde melodie uvvernimt in ing groete crescendo.

(Ravel - Bolero)

4. "1812" van Pjotr Iljitsj Tchaikovsky, gesjreve en vur 't uursj opgeveurd bie de eupening in 1882 van de Christus Verlosserkathedraal in Moskou, die geboewd is ter iere van de uvverwinning op Napoleon.

(Tchaikovsky - 1812)

5. "Land of Hope and Glory" oet Pomp and Circumstance van Edward Elgar.

Land of hope and glory, Mother of the free

How shall we extoll thee, Who are born of thee?
Wider still and wider shall thy bounds be set
God who made thee migthy, make thee mightier yet

(Elgar - Pomp and Circumstance)

6. "Ridderdans" of Montagues & Capulets oet Romeo & Juliet van Sergei Prokoviev.

(Prokofiev - Romeo & Juliet)

7. "Can Can" oet Orpheé aux enfers (Orpheus in de oonderweld) van Jacques Offenbach. Och de Sabeldans van Aram Khachaturian wurd es 'nne cancan-dans gezie.

(Offenbach - Orpheus in the Underworld)

8. "40e Symfonie" van Wolfgang Amadeus Mozart.

(Mozart - 40e Symfonie)

9. "Die Walküre" of Ride of the Valkyries van Richard Wagner.

(Wagner - Die Walküre)

10. "Toccata" en Fugue van Johann Sebastian Bach. Ok, 't is ging symfonie of orkessjtuk, mè 't is te bekind um zoemer uvver te sjloe..

(Bach - Toccata & Fugue)

En natuurlik houwe d'r och ander sjtukke in kinne sjtoe, wie de Veer Jaorgetieje van Vivaldi, de Sacre de Printemps van Stravinsky, Dvorak, Rachmaninov, Sjostakovitsj, Strauss, Grieg, Liszt en versjillende volksledere..