't Weldoorrecord is gaene wedstrijd dae op 'n vaste plaats of vaste tiëd wurd georganiseerd. Dis tiëdrit organiseert d'r renner zelf, keest zienge aege datum en och z'n aege plaatsj: 'n wielerbaan.
't Principe is seempel: d'r renner begint mit fietse en nao precies 1 oor wurd gekeke wie wiëd dat e is gekomme en dae aafsjtand wurd vergeleke mit iedere records. 't Is d'r enige wielerwedstrijd daeste neet wins dur 't sjnelste 'nne vaste aafsjtand aaf te liegke, mè dur zoeväöl mäöglik aafsjtand in 'nne vaste tiëd aaf te liegke. 't Is dus och d'r enige wedstrijd dae al 140 jaor doort en oeste 't opnims tenge renners van die aafgelaope 140 jaor. Vergeliekbare records hubse bie 't laope en sjaatse.
(James Moore, op de foto 74 jaor)
't Record gaet truuk tot
1873, es
James Moore in Wolverhampton 23,331 km fietst. In 1893 is
Henri Desgrange d'r 5e dae 't record hat dur uvver de 35 km te goe. Tot an d'r Uursjte Weldoorlog zun d'r 15 records, oëvan de litste 6 kiër dur 2 luuj: d'r Fransoos
Berthet en d'r Zjwitser
Egg, die in '12, '13 en '14 ederskiër 't record van d'r andere aafneme. D'r driejde kiër van Egg blief sjtoe tot 1933 es
Jan van Hout 't record in Remung verbrik mit 250 m. In d'r Twiede Weldoorlog verbrik
Fausto Coppi 't record en dat zou pas 14 jaor later verbroke were, dur
Jacques Anquetil, dae 't datzelfde jaor nog verluus en 11 jaor later, in 1967 kriet hee 't wer truuk.
Eddy Merckx is in 1972 vurläöpig d'r litste recordhouwer.
De liës is neet compleet, mè hie de vurnaamste:
23,331 km - James Moore (VK)
1873 i Wolverhampton
Uursjte record
32,454 km - Herbert Lydell Cortis (VK)
1882 i Ingeland
Uursjte kiër uvver 30 km
-
Henri Desgrange (Fra)
1893 i Paries
Initiator van d'r Tour de France
(Henri Desgrange, 1893)
39,420 km - Marcel van den Eynde (Belsj)
1897 i Paries
Uursjte Belsj dae 't record brik
44,247 km - Oscar Egg (Zwi)
1914 i Paries
Hee hat ederskiër de driej records van Marcel Berthet versjlage.
44,588 km - Jan van Hout (Ned)
1933 i Remung
Uursjte Hollender dae 't record brik
45,871 km - Fausto Coppi (Ita)
1942 i Milaan
47,493 km - Jacques Anquetil (Fra)
1967 i Milaan
49,431 km - Eddy Merckx (Belsj)
1972 i Mexico-Sjtad
(Fiets van Eddy Merckx, 1972)
Francisco Moser gaet in 1984 vur 't uursj uvver de 50 km en wurd in de jaore '90 dur
Obree, Boardman, Indurain en Romiger opgevolg tot uvver de 56 km. Mè dis renners hubbe gebruuk gemak van hypermoderne aerodynamische fietse, mit toe rajjer, e lieger väörraad, e groeter achterraad, enz: d'r fiets wurd belangrieker dan d'r renner.
50,808 km - Moreno Moser (Ita)
1984 i Mexico-Sjtad
55,291 km - Tony Romiger (Zwi)
1994 i Birmingham
56,375 km - Chris Boardman (VK)
1996 i Birmingham
Umdat neet d'r renner, mè ummer mië d'r fiets gaet bepale wie sjnel daste gaes, were dis records in 2000 oet de liës gehold en hievur wurd 'n aparte liës gemak: "Best Human Effort".
Vanaf dan is 't record van Merckx wer geldig en mot 'n record op 'nne vergeliekbare fiets gedoe were. In 2000 fietst
Chris Boardman 10 meter wiër dan Merckx en in 2005 daet d'r Tsjech
Ondrej Sosenka dao nog 'ns 250 m bovenop.
49,441 km - Chris Boardman (VK)
2000 i Manchester
49,700 km - Ondrej Sosenka (Tsj)
2005 i Moskou
't Record maog dan wer truukgegeve zie an 't lichaam i.p.v. d'r fiets, mè de interesse keldert en gaene daet mie 'n poging. Totdat in begin 2014 't reglement wer wurd aangepas: de fietse hoeve neet mie 40 jaor truuk in d'r tiëd te goe, mè de normaal raegels in reguliere tiedritte gun gelde. Dizze gulde middeweeg mot 't record nuuj leve inblaoze en dat luk! In augustus fietst
Jens Voigt zieng litste koerse en hee mak bekind dat hee in september zieng carrière zal aafsjlete mit 'n recordpoging. Dat hee mit 'nne tiedritfiets en zieng capaciteite Sosenka zal kloppe, dat is wal zekker, mè de vraog is vurral mit wieväöl en wielang dat e 't hult. Diek 'nne mond later wurd hee al versjlage dur d'r Oosterieker
Matthias Brändle.
(Fiets van Jens Voigt, 2014)
51,110 km - Jens Voigt (Dui)
18 september 2014 i Grenchen
Teves zieng litste wapefeit es profrenner
51,852 km - Matthias Brändle (Oos)
30 oktober 2014 in Aigle
Op dit moment 't regerend record!
POGING - Jack Bobrigde (Aus)
31 januari 2015 i Melbourne
-
Rohan Dennis (Aus)
8 februari 2015 i Grenchen
POGING - Alex Dowsett (VK)
POGING - Thomas Dekker (Ned)
POGING - Bradley Wiggins (VK)
POGING - Alex Rasmussen (Den)
POGING -
Tony Martin (Dui)
2016
Mit dis records liek dit prachtige onderdeel van 't fietse wer nuuj leve iggeblaoze. Och de 'echte' tiedriejers wille zich noe goon bemeuje. Zoe gaet Jack Bobridge op 31 januari 'n poging wage, Rohan Dennis op 8 februari en Alex Dowsett op d'r 27e. Och wil Thomas Dekker in begin 2015 't record goon aanvalle, hat Bradley Wiggins aangekondig in d'r zommer in Mallorca 'n poging te doe en Alex Rasmussen in 't naojaor van 2015. Tony Martin pas e jaor later; heë wil wachte tot nao de Sjpeule van 2016 in Rio. Och Taylor Phinney bedeenkt zich uvver 'n poging. Mesjien dat och Fabian Cancellara en renners wie Tom Dumoulin binnekort 'n poging gunt wage. 't Weldoorrecord is truuk!
Dames:
Bie de vrolluuj begint de reeks in 1955 in de Sovjet-Unie mit
Tamara Novikova die ruum 38 km fietst. In 1978 vilt 't record in han van
Keetie van Oosten-Hagen mit diek 43 km. Tot 2000 wurd 't record dan nog 6 kiër geklop, oëvan 4 dur
Jeannie Longo, mè die were in 2000 dus neet-geldig verklaord. Mit de nuuj raegels daet Longo wer 2 poginge, mè wurd in 2003 geklop (toen nog op 'nne "Merckx"-fiets) dur 'oos'
Leontien van Moorsel, die 't record noe nog ummer hat! Mè och bie de vrolluuj zal 't record were aangevalle. Zoe zal de Britse Sarah Storey op 28 februari 'n poging wage.
38,473 km - Tamara Novikova (USSR)
1955 i Irkoetsk
Uursjte vrow die 't record neerzit
43,082 km - Keetie van Oosten-Hage (Ned)
1978 i München
Litste geldige tot 1984
48,159 km - Jeannie Longo (Fra)
1996 i Mexico-Sjtad
Litste van häör 4 neet-geldige tusje 1984 en 2000
46,065 km - Leontien van Moorsel (Ned)
2003 i Mexico-Sjtad
Op dit moment 't regerend record!
POGING - Sarah Storey (VK)
28 februari 2015 i Londe
(Leontien van Moorsel, 2003)
