Jubileum 1000 jaor

Doezend jaor gelaeje, in 't jaor 1014 nao Christus, wurd neet alling Ingeland veroverd dur d'r Deense kunning Knoet (d'r Groëte) en wurd d'r Duutsje kunning Hendrik II (d'r Hillige) dur d'r paus tot keizer gekruund, me wurd och 't "Filioque" toegevoeg an 't Credo van Nicaea dur daezelfde paus Benedictus VIII.

't Credo is de geloofsbelijdenis, de 12 artikele van 't geleuf. 't Is zoe wie alle gebede en gezange geneumd nao 't uursjte woord; 't begint mit: "Credo in unum Deum. Patrem omnipotentem, factorem caeli et terrae, visibilium omnium et invisibilium." Credo betaekent "eech geleuf" en dit gebed is in 325 samegesjtild bie 't Concilie van Nicaea. Naodat keizer Constantijn d'r Groëte 't Christendom es sjtaatsgodsdeens hat gemak, woorte de geleuvige dus neet mie vervolg en begint 't bovvegroonds an 'n aenwurding. In de uursjte iëwe zun d'r tal van sjtreuminge ontsjtande, die zich toch zelde tengekeme. Mè noe 't 'n officieel geleuf is, mot me 't uvver zake ins were en in d'r 4e iëw were dus versjillende vergaderinge (concilie) gehotte. In 325 is 't Credo nog neet compleet, want de drievuldighaed wurd pas in 381 toegevoeg bie 't Concilie van Constantinopel: "et ex Patre procedit"

In 1014 voegt paus Benedictus d'r 8e dao nog an toe, dat d'r Hillige Gees neet alling oet God d'r Pap vurkumt (et ex Patre procedit) mè óch oet d'r zoon: "Patre Filioque". De toevoeging "-que" is 'n opsomming, zoe waet vur bevurbeeld van 't SPQR: Senatus PopulusQue Romanus - senaat én volk van Rome. De oosterse keerke waore 't dao neet mit ins; volges hun kump d'r Hillige Gees alling oet God, zoe wie Johannes sjrief: "d'r gees van de woerhaed, dae van d'r pap oetgaet" (Joh.15:26). Dit zou oeteindelik 't Oosters Sjisma were in 1054: de sjplitsing tusje Rooms Katholiek en Oosters Orthodox. Wat 3 litters tewaeg kinne bringe..

Bekiek hie aander jubilea.