Religieus of Spiritueel

Religie, mesjien ing van de miëst fascinerende aspecte van d'r miensj. Me wat is 't aegelik?

Veer deenke uvver 't algemeen dat luuj in vreuger dage vol zote mit vraoge uvver hun umgeving. 't Is vur e groët deel begonne in de Neolitische Revolutie. De wat? D'r tiëd dat luuj van jage uvvergonge nao landboew. Bie 't jage hubse neet zoe ziër gode nudig, me vurral krach, sjnelhaed en behendighaed. Me este d'n ete verboews in plaatsj van vings, dan hubse ander krachte nudig. De zon, d'r renge, d'r baojem en die bepaalse neet zelf. Of de zon edere dag opkump, of 't op tiëd rengent, of d'r weenter uvverwonne wurd, dat zalle wal hoëger machte bepale. Vur gun d'r dus vanoet dat 't dit soort vraoge en oonmach is, die d'r vur gezurg hat dat luuj op zeuk gonge nao antwoorde, nao wieste die kins beïnvloede. Zoe hubbe ze ooit verzonne dat oonwaer kump van 'nne god dae uvver de wolke vuurt mit zienge sjtriëdwage en dae 'nne bliksemflits nao oonder broejt. En 'nne andere god hat de weld gemak, die plat is, mit 'nne hiemel d'rbovve en 'n hil d'roonder. Oondertusje waet vur ummer better wie 't waer inae zit en wie de weld ech is ontsjtange.

Eech deenk juus dat 't neet de vraoge, me de antwoorde zun, die de oorzaak van religie is. Religie sjtaet geliek an mach. Spiritualiteit sjtaet juus geliek an vriejhaed, me dao uvver later mië. Juus die mach is ouwer es religie. Vur waore - en zun nog ummer - gewoen 'nne groep ape. Vur zun sociaal dere die in groepe laeve en die 'nne leider nudig hubbe. Kiek mer 'ns nao de alfamennekes bie gorilla's. D'r leider hat vur zieng mach motte vechte, heë zal ze vas motte houwe en motte verdedige tengenuvver oetdagers. Precies dit fenomeen zieste bie religies. 't Feit alling al dat de groetste religies monotheïstisch zun, sjtaet symbool vur dat alfamenneke. Dae god sjtaet geliek an d'r leider. De miëste leiders lotte zich och kroëne of egaal get, um mer die mach te legitimere. "Kiek mer, eech bin gekoze dur god, um euch te leide!"

(American Jesus, Bad Religion)

Väöl revoluties gun dan och gepaard mit 'n ander religie. De ouw religie legitimeert op alle vlakke de besjtaonde machhubbers. Wilse de mach uvverneme, dan kinse neet op diezelfde religie boewe, me zalse 'n nuuj nudig hubbe. Zoe gong de Franse Revolutie gepaard mit 'n anti-religie. Alle bezit van de keerk woord geconfisceerd, gaestelike moeste 'n eed aafligke en andersj gonge ze oonder de guillotine, juus wie d'r ouwe machhubber: Louis XVI. Och de socialistische / communistische revoluties zun anti-religieus. En de reformatie in d'r 16e iëw boewt op d'r zelfde god, me ziet alle ouw katholieke symboliek es heidens of ketters. Dat zun namelik typische wäörd um luuj oet te sjlete, die neet in dienge god geleuve.

Geleufse neet in ozze god? Geleufse neet dat de weld in 6 daag gemak is? Geleufse neet dat de weld plat is? Geleufse neet dat alle luuj vurkomme oet Adam en Eva, die 2 zoëne kraoge, oëvan d'r aene d'r andere vermoorde? Dan biste 'nne ketter, dan zalse branne in de hil en es opwermer zalse hië op Aerd och alvas brenne!

Geleufse nog ummer in die ouw religie? Die beum en bronne veriëre? Dan biste 'nne heiden en moste bekiërd were! Ofse 't noe wils of neet. Zoe hat Karel de Grote haof Europa veroverd en oonder gods (of zieng aege) gezag geplaatsj. Bie de Sakse waor Karel dudelik: bekiëre of d'r doëd. Karel zou zoe'n 4500 Sakse 'nne kop klinger gemak hubbe, umdat ze neet in zienge god woolte geleuve en gedupt woolte were. E paar jaor later zou Karel dur d'r Paus (d'r plaatsjbekleijer van god op Aerd) gekroënd were tot Rooms Keizer. Ederaen dae in dae god geleuft (alle ander luuj zun al doëd), geleuf dus och in Karel en oonderwerpt zich daodur an hem.

Hulse deech neet an gods (os) raegels, dan biste verdoemd en kumse neet in d'r hiemel. In feite zun al die raegels, 10 geboden, 7 hoofdzonden enz. enz. allemaol d'r vur gemak um deech tot sjlaaf te hotte. De mos en zals gehoorzame! Este werkelik dur dae god besjtraof wurs vur dieng zun, vurwat mot dat dan och nog 'nne kiër hië op Aerd? Dat bewies dat d'r ginge god is, me dat 't puur um mach op Aerd driejt. Mach mot gelegitimeerd were en dao is religie de perfecte oplossing vur. Bie religie gaet 't dus neet um de vraog, me um 't antwoord.

Religie = Mach.

Spiritualiteit is aegelik 't zelfde wie religie, dezelfde laevesvraoge en d'rzelfde twiefel, me ander of zelfs ging antwäörd. Spiritualiteit is 't tengenuvvergesjtilde va mach. De sjtils deech dezelfde vraoge, me d'r is gae miensj dae vur deech bepaalt wat 't antwoord is. Dat verzinse zelf of de luts 't ope. Bie oosterse religies, ouw keltische religies en zoeget wie 't boeddhisme of humanisme, oë gaene leider (mie) bovve sjtaet, die zun spiritueel, me neet religieus.

Noe zouwse mesjien deenke dat eech get tenge religie hub. Dat is neet gans woër. 't Huurt bie d'r miensj en zal ummer blieve besjtoon, in welke vurm dan och. In de miniserie "Napoléon" besjprik d'r aansjtaande keizer de kroëning mit d'r Paus. Ze hubbe 'n geweldige discussie uvver god en religie. 't Begint mit 't feit dat Napoleon zichzelf zal krune, terwiel normaal d'r Paus dat daet, me dae is alling aanwezig um zieng heersjappiej te zengene. D'r Paus vrug 'm vervolges of e d'r zenge van hemzelf of van god wil en hee verwiet Napoleon dat dae 'religie' en 'god' verwart. Me Napoleon zaet dat heë juus 'n oondersjiët mak tusje die twie: 'n theorie: 'god' en 'n zekkerhaed: 'religie'. Napoleon liegk daonao oet dat vur bis zoonder god kinne, me neet zoonder religie, dat hat de Franse Revolutie en de Terreur beweze.

Dante

't Litste leedsje gaet uvver e geweldig book. Roond 1300 sjrief Dante Alighieri oet Florence "La Divina Commedia", de Goddelike Komedie. Dit is gaene 'comedy', me komedie is e verhaol dat good aaflup, in tengesjtilling tot 'n tragedie. Dit book wurd aeglik gezie es 't hoegtepunt oet de middeliewe en es 't begin van de Italiaanse taal.

In dat book besjrief Dante (hee wurd ummer mit zienge väörnaam geneumd) wie hee roondgeleid wurd dur 't hienaomaals, dur d'r Romeinse dichter Vergilius. De vursjtilling van d'r Hiemel en Hil zun ummer oetgebreider gewore in de middeliewe en vur kriege dur Dante 'nne kiek op wie m'n toen dach uvver die dinge. Zoe miengt hee al dat de weld roond is, mit 'n bewoende hilf en an d'r andere kant alling mer zië. De bewoende weld hat 3 continente mit Jeruzalem es middelpunt. Midde in de Aarde is de Hil, want dao is Lucifer heengebroejt. Daodur oontsjtoond an d'r andere kant van de weld d'r Louteringsberg. De Hil hat volges Dante 9 kringe, naogelang de zun die begange zun, mit d'r biepassende sjtraof. D'r Hiemel hat och 9 laoge, um de weld heen, dus wie hoeger, wie better.

't Book is gesjreve op rijm, mit hiel väöl getallesymboliek. Allemaol um 't nog hilliger te make. Zoe hat 't book 3 hoofsjtukke (Inferno, Purgatorio en Paradiso = Hil, Vagevuur (of Louteringsberg) en Hiemel), eder besjtaet oet 33 'canti' plus 1 inleidend, zoedat 't totaal op 100 kump. Die canti besjtun wer oet terzine, 3-raegelige verze, mit es sjema: ABA, BCB, CDC enz. Verwiezend nao de 3-aenhaed en d'r laeftied dat Jezus sjtorf (33).

Es uursjte reist Dante mit Vergilius nao de Hil, 't Inferno. Bie d'r ingank sjtaet de teks: "Lot vare alle hoop, este hie binnegaes (Lasciate ogni speranza, voi ch'intrate of Abandon all hope who enter here)".

Es uursjte kump e in 't Limbo, 't vurgeborchte, d'r uursjte kreenk. Dao zitte de heidene die niks misdoon hubbe, me umdat ze neet gedupt zun, were ze och neet gekweld, ze motte alling laeve in duusternis. Socrates, Plato en Saladin zitte dao.

D'r volgende kreenk is vur de wellustige, die vurgedreve were dur 'nne iewige sjturm, zoe wie Cleopatra. D'r 3e kreenk is vur de vraatzuchtige, die gemarteld were dur Cerberus. In d'r 4e kreenk motte de hebzuchtige en verkwisters zjoër dinge zinloos heen en weer sjlaepe. De rivier Styx is d'r 5e kreenk, dao in zitte de agressievelinge die zich iewig bevechte en oonder water liegke de wrokkige.

Ze komme ummer deper in de Hil en gun noe de Sjtad van Dis binne. D'r 6e kreenk is 'n grafveld mit brannende ope grave, oe de ketters in liegke. In d'r 7e kreenk lieje de geweldplegers in 3 versjillende dele: in d'r uursjte liegke die wat geweld gepleeg hubbe tenge andere, lichamelik of hun bezit, in 'n kolkende bloodrivier, bevurbeeld Atilla de Hun. 't 2e Gedeelte is 'nne busj van zelfmoordeners die verandere in beum en gekweld were dur harpijen die hun sjerpe klauwe in de tek zitte. 't 3e Deel is 'n woestijn, dao renne de geweldplegers tenge God, de natuur en de kuns roond es d'r vuur op hun rengent.

D'r 8e kreenk, Malebolge, is vur de bedregers, verdeeld in 10 dele:
1. Verleiders en koppelers renne in tengegesjtilde richting, opgezjweept dur duvele.
2. Vliejers liegke in e bad vol drek.
3. Simoniste en 'n aantal pause zun levvend begrave en alling hun brennende veuj sjteke bovve d'r groond oet.
4. Magiërs, hekse en zieners laope roond mit hunne kop achtersjteväör op d'r nak.
5. Corrupte politici en ambtenerre liegke in e bad van kokend pek, belaag dur duvele.
6. Huichelers laope in loej pieje. Kajafas liegk dao in kruushouding geneggeld op d'r groond.
7. Deve ontbranne en herrijze wer oet d'r esj en were opgejaag dur sjlange.
8. Sjlechte raodgevers brenne, oe oonder och Odysseus, van 't Peerd van Troje.
9. Schismatici were vermeenk dur 'nne duvel mit e zjwaard, zoe wie Mohammed.
10. Alchemiste en vervalsjers lieje gruwelike kwaole.

In de Cocytus, d'r 9e kreenk van de Hil, zitte de verraojers vasgevrore in e meer van ies. De 4 dele zun verneump nao bekinde verraojers:
1. Caïna, verneump nao Kaïn, verraojer van familie.
2. Antenora, verneump nao Antenor van Troje, landverraojer.
3. Ptolemaea, verneump nao Ptolomaeus, verraojer van gaste.
4. Judecca, verneump nao Judas, verraojer van zienge maester, och Brutus en Lucifer zitte dao in.

Mishurt Forkort

En op dag 35 is 't tied vur e paar 'misheard lyrics':

(History of Misheard Lyrics)

(O Fortuna)

(Wishmaster)

(Even Flow)

De teks liek soms lestig, me de basis van bekans alle leedsjes is: 'Four Chord'

(Axis of Awesome - 4 Chord Songs)

Wakker were

't Ideale leedsje um mit wakker te were en in 013 nog same mit Céline gezie:

Uvver "Wakker were" gesjproke:

Parodie

Op d'r 33e dag is 't de beurt an de leukste parodie. Dizze gekke Amerikaan hat al menig nummer vervormd, verkrach of besjpot, och dizze klassieker, "Smells like Nirvana":

Koffer

Dag 32, mienge favoriete cover. Covers zun zelde good, umdat 't origineel miestal perfec is. 'nne Gojje cover huurt los te sjtoe van 't origineel, z'n aege krach te hubbe. "Hurt" van Johnny Cash is e good vurbeeld van 'n nummer dat 'n ander betaekenis hat gekrege, dur 't te covere. Guns n' Roses hat bevurbeeld "Knockin' on Heavens Door" 'n gans aege sjtijl gegeve, mit name de "hey hey-ey-ey" zun 'n aege leve goon lieje. Och the Stones hubbe 'n nummer van d'rzelfde jong gebruuk, mit d'r toepasselike titel "Like a Rolling Stone". Boudewijn de Groot hat dan wer leedsjes van hem vertaald nao 't Hollesj. Eech hub 't inderdaad uvver Bob Dylan.

Bryan Ferry, dae van Roxy Music, van "Love is the Drug" en "Let's stick together", oetgerekkend dae hat 'n ganse cd gemak mit Dylancovers: Dylanesque. Op die plaat hat e och 't bekinde "Make you feel my love" (en nae, dat is neet van die hoor oet Ingeland!) prachtig bewerk, in 'n hiel aege sfeer. Och nummers wie "Times they are a-changin" en "Knockin' on Heavens Door" sjtun d'r op.

Wae 't ganse album wil loestere:
1. Just like Tom Thumb's Blues
2. Simple Twist of Fate
3. Make you feel my Love
4. Times they are a-changin'
5. All I really wanna do
6. Knockin' on Heavens Door
7. Positively 4th Street
8. If not for you
9. Baby, let me follow you down
10. Gates of Eden

Foutje bedankt

Nao de 30 leedsjes, hub eech zelf nog 'n aantal titels bedach. Dag 31 wurd: e leedsje oeste 'n faot in hubs ontdik. Ok, 't is mer e klae fäötsje en alling in de drumpartiej, me toch. 't Leedsje is uvver de ganse weld bekind en bie alle generaties: "Black Betty" van Ram Jam.

't Leedsje is bis aardig, och wal leuk um zelf te sjpeule. Dus dan gaeste 'ns oplitte, wat sjpeule ze precies? 't Hat driej couplitte en dao in sjpult d'r drummer op d'r til de base drum en tenge d'r til i sjlaet e de hi-hat aa. Me loester 's good nao 't driejde couplit. Precies! Dao vergit d'r drummer de uursjte twie tikke op de hi-hat!

Jaor gelaeje

En zoe is d'r litste dag aagebroke. Dag 30 mit es thema: mië favoriet leedsje van e jaor gelaeje. Wat toen mieng favoriet leedsje waor, waet eech neet mie precies. Me e jaor gelaeje woord eech gevrog dur de dirigente van d'r zaank um te zinge in e projec-koër uvver de Renaissance. Dao hub vur noe al 'n aantal repetitierundes achter d'r rugk. In 't reportoire zitte 'n dael liturgische leedsjes, zoe wie 'n "Ave Verum", me och sjoen weldse sjtukke wie "Il bianco e dolce cigno" en "Now is the month of maying" en e luchtig sjtuk daste mesjien op 'n middeliewse mert zouws tengekomme: "Il est bel et bon". De oetveuring is troewes op zoondig 10 november i Wolder.

Me ae sjtuk sjtik mit kop en sjowwer d'r bovvenoet en dat is "La Guerre - La Bataille de Marignan". Dit is dudelik gae religieus leedsje, me 'n propagandamiddel gesjreve in 1528 dur Clement Janequin oet Paries.

't Leed gaet uvver d'r veldsjlag bie Marignano (bie Milaan) van 13 en 14 september 1515 tusje d'r Franse kunning Frans I en Ferdinand II van Aragon. Tusje 1494 en 1559 zun d'r versjillende oorloge um en in dele van Italië. Dit is d'r besjlissende sjlag van d'r 2e Italiaanse oorlog (d'r oorlog van de Liga van Kamerijk, 1508-1516) dae eindigt mit de Vrede van Noyon. Op d'r 13e uvverdag en daonao sjnachs gaet 't fleenk op en neer tusje de Zjwitsers en de Franse. Op d'r 14e komme Venetiaanse troepe de Franse helpe en winne ze. Frans I wint dus d'r sjlag en kriet daodur 't Hertogdom Milaan wer in zie bezit. Later kump Frans wer in oorlog mit d'r opvolger, Keizer Karel V, in d'r 3e Italiaanse oorlog, oë Frans in 1526 (es 't leed nog neet veerdig is!) zelfs gevange wurd genome, dus 't gaet nogal heen en weer.

Dan uvver 't leed zelf. Dit leed is gesjreve in 'nne tied dat nog ginge tillevies, internet of zelfs nog mer gezit besjtong. Zoe wie oet die oorloge bliek, wiste luuj soms nog mer amper bie welk kunnink- of keizerriek ze noe wer hoerte. Lot sjtoe dat ze dae kunning ooit gezie houwe. Es dae kunning 'n belangrieke uvverwinning gehold hou, moes dat wal bekind were gemak in den lande. Dus dit leed is dudelik e propagandamiddel vur Frans I. D'r componis Janequin sjtaet bekind um 't naodoe van geluide. Dat daet e och in dit leed, zoe were de klaroene, de peerd, de kanonne en muskette allemaol gezonge.

In 't begin huurse bevurbeeld "le noble Roy Françoys" en "le fleur de lis" es inleiding, mit 'nne eenkele "alarme". Vanaf 3:20 huurse de klaroene "Fan frere le le ran fan" en "fa ri ra ri" - de troepe verzamele zich. Daonao huurse vanaf 5:00 de kanonne: "Von.. von.. von.." en de muskette "pa ti pa toc" - d'r sjlag begint ech. De klaroene gun oondertusje dur mit "Ta ri ra ri" en de troepe were nog aangemoedig mit "Courage!" en vanaf 6:10 kump de cavalerie in beeld mit "Pa ti pa tac choc choc choc". De besjlissing vilt pas op 7:15 mit "Ilz sont defaitz!" en "Victoire! Au noble Roy Françoys!" en wae dao good loestert huurt zelfs de (bekans plat kallende) Zjwitsers sjriëwe: "Toute frelore, bi Got!" Mit ander wäörd: alles verlore, bie God! Me dan op z'n Frans!

Jeug

D'r vurlitste alwer: e leedsje oet mieng jeug. Loester en geneet:

(OPM - Heaven is a Halfpipe)

(Wheatus - Teenage Dirtbag)

(LeAnn Rimes - Can't fight the Moonlight)

Sjuldig

Van de 30 opdrachte, is de 28e e leedsje oëdur eech meech sjuldig zou veule. Eech hub lang naogedach, me eech veul meech nurges sjuldig uvver. Dus dan is 't lestig e leedsje daobie te verzinne. Nou, hoegoet, hiel mesjien, zou dizze daovur dur kinne goe:

Mesjien väöl leuker is e nummer oë eech dankbaar vur bin. Want dankzij mie leef achternisjeke Joyce koes eech toch nog nao Pinkpop goon afgelaope jaor. Het waor helaas geblesseerd en koes daodur neet goon. Vur zun dae murge nog nao Remmersjtok gegange mit de sjutteriej, um e päölke te howwe en de Poorten van Reijmerstok te eupene. Daonao nog nao Tebannet oë kermis waor en toen dur nao Sjaesberg, nao de draverenbaan, nao Sjmeetspop, nao d'r Broës va d'r Sjpringsjteë, zigk mer d'r Boss!

Neet op instrument

Dan natuurlik och e leedsje dat eech neet op 'n instrument kin sjpeule, me wal gan zou wille. Kom eech toch wer truuk bie In Extremo. Die hubbe e paar nummers oet de Carmina Burana gebruuk. Neet 't van Carl Orff bekinde "O Fortuna", me "Hiemale Tempore" en "Omnia Sol Temperat". Dat litste gaet uvver 't vurjaor en alles wat dao bie huurt: de zon, de wermte, de vreugde en de leefde. Mit name 't sjpil van de doedelzek zou eech gan wille kinne.

Omnia sol temperat, Purus et subtilis
Novo mundo reserat, Faciem Aprilis
Ad amorem properat, Animus herilis
Et iocundis imperat, Deus puerilis

Ama me fideliter, Fidem meam nota
De corde totaliter, Et Ex mente tota

Rerum tanta novitas, In sollemni vere
Et veris auctoritas, Iubet nos gaudere
Vices prebet solitas, Et in tuo vere
Fides est et probitas, Tuum retinere

Vrieje vertaling:

De zon verwermt alles, puur en zach
't Gezich van April eupent 'n nuuj weld
Nao de leefde wurd d'r miensjelike zeël gedwonge
En de vreugde wurd geraegeld dur d'r jonge God

Hou troew va meech, kiek wie eech troew bin
Mit gans mië hart en mit gans mienge zeël

Al dis wedergeboorte in 't fees van 't vurjaor
En de mach van de lente gebeejt os te genete
't Toënt os waeg die vur good kinne en in Dieng lente
Is 't woër en good te behouwe wat van Deech is

Wal op instrument

Op d'r 26e dag is 't tied vur e leedsje dat eech op 'n instrument kin sjpeule. Dus neet zinge en op drums is alles wal te sjpeule. 'n Ander instrument dat eech besjpeul, is dus de klaroen of trompit. Nevve alle klaroenmarsje, cramignons, signale en ander sjutteriej-gerelateerde zake, kin eech och "My Way" van Frank Sinatra sjpeule. Mit get geluk kleenk dat oongevaer zoe:

Lache

Vur komme al wiëd an 't eind, mit dag 25 van de 30: e leedsje dat meech lut lache. 't Uursjte leedsje dat i meech opkump, is aent van Tenacious D:

Dan zun d'r nog nummers die vol zitte mit humor, zoe wie "The Bad Touch" oë Bloodhound Gang de preutshaed en de dubbele moraal van Amerika an de kaak sjtilt:

Of Blink182 die de boybands oet de jaore '90 op d'r hak neme:

En natuurlik:

Begreffenis

Dag 24: e leedsje vur op mieng begreffenis. 't Zou vur de hand liegke um dan "Mit de neus umhoeg" van Rowwen Hèze te keze. Och zouwste "Burn motherfucker burn" of dat soort nummers kinne oetkeze. Troewes, eech wil noch begrave noch verbrand were. Eech wil weggebroejd were, gewoen in d'r busj ofzoe. Zoe wie normaal zou zie in de natuur. Me, nae, in dis weld maog dat wer neet. En de luuj kinnende, zal eech dus toch begrave were. Dan pas dao niks andersj bie, es 't "Requiem" van W.A. Mozart, mít Dies Irae, de ganse 55 minute lank.

Broelof

D'r 23e dag wurd och lestig, e leedsje vur op mieng broelof. Broelof? Eech? Trowwe? Broelofte zun vur in sprookjes en die besjtun neet. Eder broelof is 'n farçe an sich en kin alling mer tot ellende lieje. Trowwe zal eech nooit doe en dus kin d'r gae leedsje gesjpuld were. D'r is mesjien ae nummer dat toepasselik is, van ozze Bob Marley ziëliger, "No Woman, No Cry". Dit gaet neet, zoe wie väöl luuj deenke, uvver 't vriegezelleleve, es in 'ging vrow, ging zurg'. 't Is juus e leedsje um 'n vrow te troëste, dus ieder: 'nae vrow, beuk neet'. Eder broëd is te betreure en dao pas dit nummer dan perfec bie.

Oongelukkig

Oongelukkig bin eech wal raegelmaotig en dit zun dan de leedsjes die daobie passe:

("Comfortably Numb" - Pink Floyd)

("Fade to Black" - Metallica)

("Hurt" - Johnny Cash)

Gelukkig

D'r 21e dag: e leedsje oë eech heen loester es eech gelukkig bin. Dat zal lestig were, want gelukkig bin eech nog nooit gewes en zal eech och neet were. Dan mer e leedsje oë eech op z'n mins bliej va weer: "Always look on the bright side of life" van Monty Python in d'r film "Life of Brian". Aeglik zelfs mit 'n dubbele betaekenis, want pas es eech an 't kruus hang en doëd bin, dan zal eech warsjienlik pas gelukkig zie.

Koed

Leedsjes die eech loester es eech koëd bin:

"Sometimes I feel like I just gotta get a gun and reach the top of the world my own way"

("Some Kind of Hate" - Blood for Blood)

"I am the one who chose my path. I am the one who couldn't last.
I feel the life pulled from me. I feel the anger changing me."

("Did my Time" - KoRn)

"Rather than fix the problems; they never solve them. It makes no sense at all"

("Stay together for the Kids" - Blink182)

"You're a slave to the system: working jobs that you hate,
for that shit you don't need. The world is based on greed."

("Between Angels and Insects" - Papa Roach)

"I'm forever black-eyed; a product of a broken home"

("Black-eyed" - Placebo)

"I feel the need. I think it's time to bleed.
I'm gonna cut myself and watch the blood hit the ground."

("Right now" - KoRn)

Albumleedsje

Nummer 19 van de 30 gaet dan wer uvver e leedsje va mië favoriete album. Ech áé favoriet album hub eech neet ech. D'r zun versjillende albums die eech good vin. Aent daovan is van d'r Limburgse groep Carboon. Die hubbe väöl gezonge uvver koempels en de koel. Me ze hubbe och ae album gemak uvver de bokkeriejers die in dis sjtreke gelaef zouwe hubbe. Ze sjetse dao e paar beelde wie bepaalde luuj, plaatsje en gebäörtenisse kinne zie gewes. "D'n Eijd" gaet bevurbeeld uvver de 'goddeloze eed' die de bokkeriejers aafgelag zouwe hubbe. "Sjtörm euver Wörm" gaet uvver 'nne roofuvverval op 'n boerderiej en "'t Begin van 't Einde" is e gans apart verhaol. 'nne Boer zit in d'r caffie es 't gesjprek uvver de bokkeriejers gaet. Heë sjup op uvver zië peërd dat zoe weeld is, dat de bokkeriejers 't neet durve klauwe. Aene van de caffiegaste is 'nne bokkeriejer en klauwt die nach dat peërd. Heë wil 't verkaope op d'r mert, kin neet bewieze dat 't van hem is en wurd opgepak. Terwiel e gemarteld wurd, neumt-e alle name op van de bende en die were vervolges allemaol opgepak. Dit toënt drek aan wie 't in ze werk gong, alle bewies vur 'n goddeloze bende is verkrege dur marteling. Natuurlik woord d'r geklauwd, dat is van alle tieje en mesjien toen zelfs get mië, dur versjillende misoëgste en hongersnode. Warsjienlik hat d'r nooit 'n dergelike bende besjtange en is 't ae groët verzinsel van de sjepebanke in dae tiëd. Wie 't och maog zië, d'r zun tusje 1743 en 1776 zoe'n 650 luuj opgepak, mië es de helf is veroordeeld en ruum 90% daovan (zoe'n 300) opgehange. Opvallend is dus och dat in 't toenmalige Dalhem gaene aene is opgepak of veroordeeld...

("'t Develeech": uvver 'n klauwnach)

("De Bokkeriejers van de Euvermaas")

Och de albums Dance of Death en A Matter of Life and Death van Iron Maiden zun erg good en van dae uursjte is Paschendale, e leed uvver d'r 3e Sjlag um Ieper, bie 't durpke Passendale.

("Paschendale", Iron Maiden)

Zoe wie eech al ieder vermelde, is 't uursjte echte album dat eech hoërt "Americana" van The Offspring

("Americana", The Offspring)

Neet op radio

Dag 18, e leedsje dat eech gan op d'r radio hui gehuurd.. Eech loester natuurlik selectief radio, dus vurral neet nao de väöl te commerciële zenders wie 3FM en wie ze allemaol maoge heesje. Dus de miëste leuke nummers en bands huur eech wal, me mienge topfavoriet nog ummer neet. Eech vraog ze eders kiër aan bie de Top2000, Arrow Rock 500, neum mer op, me nog gaene aene kiër op d'r radio gehuurd: In Extremo.

(Zigeunerskat, album Sterneneisen)

Nog e leedsje dat eech gan loester, mitzing en dus gan 'nne kiër op d'r radio zou wille hure:

(Ode an die Freude, Beethoven)

Wal op radio

Leedsjes die eech op d'r radio huur. Aangezië eech vurral d'r uursjte Hollender loester, huur eech wienig leedsjes, me vurral gebazel. Ander zenders die wal 's opsjtunt, zun Studio Brussel, Classic 21 of Arrow Classic Rock. Dan kinse wal afleide wat dao dik gedriejd wurd. Van de classic rockleedsjes, deenk eech dat Golden Earring 't miëste gesjpuld wurd en dan mit name 'Radar Love':

Op StuBru is De Afrekening nog ummer favoriet en dis week zitte dao o.a. in:
4. 'Mein Herz Brennt' van Rammstein. Huh, dae is toch al 12 jaor aod?
15. 'Follow Me' van Muse. Lits nog opgeveurd dur e bejaardekoër same mit Muse.
20. 'Lover of the Light' van Mumford and Sons. Lut meech drek truukdeenke an Pinkpop..
Me e nummer dat blief hange, kump toch van The Vaccines. Op 16 sjtaet 'I Always Knew':

Vreuger en noe

Dag 16: e leedsje oë eech vreuger gek op waor, me dat eech noe haat. Hmm, eech waet nog dat eech hiel vreuger de cd Helmut Lotti goes Classic hou. Eech bin bliej dat eech die neet mie hub of althans neet mie kin veende. Oondertusje waet eech dat neet de leedsjes zoe erg waore, want dao zitte bis e paar leuke tusje: "Toreador" oet d'r opera "Carmen" van George Bizet en "Nabucco" (Slavenkoor) oet d'r opera "Aïda" van Guiseppe Verdi. Me dizze sjtaet symbool vur de ganse cd en d'r ganse jong:

(Tiritomba, Helmut Lotti)

'n Ander cd die eech al hiel lang hub, is 'n verzamel-cd mit klassieke muziek. De basis die ederaen zou motte kinne, mit toppers zoe wie: "Rondo alla Turca" van W.A. Mozart, "Für Elise" van L. von Beethoven en "La Primavera" oet de Veer Jaorgetieje van A. Vivaldi. Och loesterde eech al hiel vreug nao Rowwen Hèze, me juus wie klassieke muziek, vin eech dat nog ummer leuk. De uursjte echte rock-cd waor "Americana" van The Offspring, me och die haat eech nog neet. Wat eech wal oondertusje neet ech mie loester:

En um Marieke nog e plezeer te doë:

Meech

Op de helf van de 30 daag: blog 15, e leedsje dat meech umsjrief. Kom eech dan toch wer bie Rowwen Hèze oet, 't leedsje dat d'r zelfde naam dreug es de band. Allebei verneump nao 't volksfiguur "de Ruwe Haasen", in America dus d'r Rowwen Hèze. 'nne Soort kluizener, dae nog knieng sjträöpde en sjpoorbielze klauwde vur op de kachel, me dae och deeg helpe bie bevallinge en 'n soort medicijnman waor: "ik maak zelf wal oet waor ik an doëdgaj". Later natuurlik tot mytische proporties oetgegreujd en besjreve in dit leed, mit es motto: "de jaore dat ik onder bin, how ik meejzelf wal dor 't laeve hin"

Ik, ik heb mien eige leave,

niemand um de schuld te geave,

niemand um meej hin di leupt te zeure.

Ik heb genog niks te klaage.

Wat ik heb dat kan ik draage.

Wat zuj ik met miër gaon loëpe leure?

Ik zeuk miene eige waeg, vol is vol, laeg is laeg.

Ik heb alles wat ik kan gebroëke.

De jaore dat ik onder bin,

how ik meejzelf wal dor 't laeve hin.

Lat meej mar drinke wat ik drink.

Lat ze mar praote aover meej.

Lat ze mar zegge dat ik stink.

Dat giet vanzelf wal wir vurbeej.

Want ik, ik bin vur niemand schow,

vur onwaer neet en neet vur ow.

Ik duj mien ding en verder lat mar weije.

Als ik zin heb dan duj ik mien werk,

is 't nuudig gaj ik nar de kerk,

als 't echt neet anders kan dan gaj ik beije.

Ik regel miëne eige tiëd, ik merk vanzelf hoe 't giet,

ik maak zelf wal oet waor ik an doëdgaj.

De jaore dat ik onder bin,

how ik meejzelf wal dor 't laeve hin.

Genne roeie cent um te betale,

niks um op de hals te hale,

niks um te onthalde of vergaete.

Gen gezeik, gen probleem,

of ik wat miër of minder neem,

of wat zuj ik vandaag nog motte aete.

Ik heb alles beej de hand,

mien eige zon, mien eige land,

miëne boëm, mien wolke en mien sterre.

De jaore dat ik onder bin,

how ik meejzelf wal dor 't laeve hin.

Oonverwach

Dag 14 alwer. Oonverwach is d'r titel en och de leedsjes. Leedsjes oevan gaene verwach dat eech ze leuk vin. Dan moste natuurlik uursj waete wat eech wal leuk vin, dao-oet concludere wat eech neet leuk vin en vervolges verras were dat eech ze dan mesjie wal leuk vin. Dat eech al 4 jaor in e keerkkoër zou zinge, zou warsjienlik al gaene verwach hubbe. Neet dat eech geleuf, want eech geleuf d'r namelik niks va, me mot dat da? Eech vin 't heerlik um te zinge. 't Zun vurnamelik leuke en sjoen sjtukke die vur dunt en um same an get te werke dat oeteindelik zoe sjoen kin were, is geweldig. Dao kom eech drek bie nog 'n belangrieke raej: de saamhorigheid. Eech besef dat vur in 'nne individualistische tied laeve en um lid te zie van 'n sjutteriej, joonkhaed en d'r zaank, dreug toch bie an e laefbaar durp en letterlik: "same laeve". Boete dat is 't erg gezellig nao de rippetiesje en kinse och get hiel sjoens make van begreffenisse of gouwe broelofte. Loester mer 'ns nao dit sjtukske (troewes mieng wikker-melodie) van d'r componis oevan gezag wurd dat God väöl an hem te danke hat:

(Jesu bleibet meine freude, J.S. Bach)

Wat och gaene zal verwachte, dat eech 'n aantal dance-artieste good vin. O.a. Faithless, Moby, me och Audio Bullys en bevurbeeld Pendulum:

Och oonverwach: Eminem, mit "The Way I Am":

En nog aene vur 't af te liere, d'r 'Hoera' van d'r zaank:

Guilty Pleasure

My Guilty Pleasure. Mie sjuldig genot. Wat zou dat zië? Warsjienlik kom eech dan al gauw roond 't jaor 2000 oet. Dames wie P!nk of Nelly Furtado, Chantal Janzen of Gwen Stefani, Sita of Birgit Schuurman, me áé nummer sjtik toch bovve alles en ederaen oet. 'n One Hit Wonder puur sang: Alizée mit "Moi, Lolita":

Versjrikkelik

Van mieng favoriete band, kumse dan automatisch bie de band die eech haat. Boete dus alle artieste van Motown en alle andere disco, hollensje crap en dj-oonzin, kom eech dan oeteindelik bie The Queen of Rock, op 't Hollensj dan. Jao, eech hub 't uvver Anouk. Eech kin die neet luchte of zië, lot sjtoon hure. Eech mot toegeve, vreuger hou ze nog e paar aardige nummers, zoe wie Nobody's Wife en R U Kiddin Me. Me The Dark en al gans Michel waore al neet mie um aan te hure. Daonao is 't nooit better gewore en hat ze mit Girl 't absolute deeptepeunt bereikt. De bis gewaarsjuwd:

Um mer op 't Hollensj te blieve, nog 'n band oë eech e trauma aan hub opgelaope: Perzik, better bekind es Krezip. Och daobie mot eech toegeve, de gitariste, jao, me de zangeres, nae, ech neet. Egaal welke band neet kump opdage op Pinkpop - Depeche Mode, Amy Wienkelder - zie sjtonge wer veerdig... Oërdoppe i?

In Extremo

"E leedsje va mieng favoriete band." Vreuger zou dat zekker Rowwen Hèze zie gewes. Jack Poels sjrief heerlike tekste en eech zal ummer gehech blieve an hun leedsjes. Me de muziek is erg, ja wie zaeste dat, seempel en väöl van 't zelfde. Saxon en Iron Maiden komme och in de buurt, me hubbe juus neet, ja dae X-factor, zal vur 't mer neume. Ruum 10 jaor gelaeje hoert eech 't leedsje "Vollmond" en waor drek verkoch. Leefde op 't uursjte... gehuur. D'r gong 'n weld vur meech ope, wie eech de diversiteit an leedsjes, tale, melodië, instrumente en tekste lierde kinne: In Extremo.

"Ich kenne alles, auf Punkt und Strich.
Ich kenne nur einen nicht; und der bin ich"
(Ich kenne alles)

(Villeman og Magnhild, DVD Raue Spree)

Ze komme oet Berlien en neume zich och wal "Die Sieben Vaganten" en hubbe alle zeve 'nne bienaam:

'Das letzte Einhorn' - zenger, citer
'Dr. Pymonte' - doedelzak, harp, sjalmei
'Flex der Biegsame' - doedelzak, sjalmei, driejlier
'Yellow Pfeiffer' - doedelzak, sjalmei, nyckelharpa
'Van Lange' - gitaar
'Die Lutter' - bas
'Der Morgenstern' - drums / percussie

"Ich bin der ausgestoßene Sohn und euer Spott ist mein Judaslohn" (Raue See)

(Erdbeermund, Wacken 2006)

Vurral op de vreugere albums sjtun hiel ouw tekste. Van Goethe gebruke ze 't gedich "Rattenfänger" en van d'r 15e iewse Fransoos François Villon hubbe ze "Rotes Haar" en "Erdbeermund" nao 't Duutsj vertaald. Rattenfänger gaet dudelik uvver 't bekinde sprookje, Rotes Haar is e leefdesleedsje an e maedsje mit roëd haor en Erdbeermund gaet neet uvver 'nne moond, wal uvver bepaalde lippe...

"Was gibt es Schöneres als im Feuerschein mit der Liebe eins zu sein?" (Wind)

(Neues Glück, album Sængerkrieg)

Oet d'r 9e iew komme de "Merseburger Zaubersprüche I en II", die pas 1000 jaor later ontdekt woerte en zun gesjreve in de Karolingische minuskel (soort handsjrif ontworpe dur Karel de Grote). Dit zun same de enige, in 't 'Aod-Hoëg-Duutsj' gesjreve bronne oet dae tiëd uvver de polytheïstische religie. 't Zun, zoe wie 't woord al zet, twie toversjpreuke oet Merseburg, in de buurt van Leipzig.

De uursjte sjpreuk gaet uvver de "Idisen" en zou me kinne gebruke um luuj te bevrieje:
"insprinc haptbandun, inuar uigandun"
"ontsjpring hechtenisbande, ontlaop de vijande".

D'r twiede neumt o.a. de bekinde gode Friia en Uuodan en 't is 'n genezing vur e peërd:
"sose benrenki, sose bluotrenki, sose lidirenki, ben zi bena, bluot ze bluoda, lid zi geliden, sose gelimida sin"
"zoe wie knookkwetsuur, wie bloodkwetsuur, wie ledemaotkwetsuur, knook tot knook, blood tot blood, lid tot ledemaote, zoe wie geliëmd lotte ze zië".

(Mein Rasend Herz, Rock am Ring 2011)

Ing van de uursjte Christelike bronne in 't Aod-Hoëg-Duusj is och oet d'r 9e iew en is 't "Wessobrunner Gebet", dat vertilt uvver de sjepping. Wessobrunn liegk juus oonder München.

Oet de 12e à 13e iewse Carmina Burana hubbe ze neet 't van Carl Orff bekinde "O Fortuna", me twie andere leedsjes: "Omnia sol temperat" en "Hiemale tempore"

(Herr Mannelig, Rock am Ring 2004)

Eech hub ze vur 't uursj live maoge zie op Rock am Ring 2004, toen nog op 't Alterna-stage, midde in de nach. E jaor later sjtonge ze al op 't hoofpodium, uvverdag, in d'r renge. In maart 2007 hub eech ze in 013 in Tilburg gezië en in december 2008 'nne kier in Tivoli in Utrech.

(Vollmond, Tivoli 2008)

Sjlaopleedsjes

Alwer dag 10. Leedsjes oevanse i sjlaop vils.

Dit leedsje (maog eech 't wal e leedsje neume?) is zoe versjrikkelik saai, dat eech neet andersj kin es i sjlaop valle. Troewes e geluk bie 'n oongeluk, wie gauwer dat eech i sjlaop val, wie minder eech van dit afsjuwelike leedsje hoef te hure.

Gelukkig zun d'r och fieng nummers gesjreve, die bedoeld zun es sjlaopleedsje, 'lullaby' in 't Ingelsj. Dizze hub vur mit d'r zaank de aafgelaope Keersjmes nog gezonge: "Christmas Lullaby" van John Rutter:

D'r bandnaam daet andersj vermoede, me "Massive Attack" is ging Punk-Hardcore band of Power Metal. Nae, in tengendael. Loester mer 'ns nao Teardrop:

Bie dit leedsje mot eech deech waarsjuwe. Dis kiër is 't d'r titel dae misleidend is: "It's, oh, so quiet" van de Iëslanse Björk: